صوريّه

نهر ونهار :
صوريّه
حميد البلوشي
Kalam123@hotmail.com

القصيدة التاليه صيغت على اعتبار انها قصيدة غنائية يؤديها الفنان صلاح الزدجالي ألقيت في لقاء جماهيري رياضي تشرفت به بولاية وادي بني خالد وتم تداولها عبر شبكة الإنترنت .. اوجدت ردات فعل متباينه لحظة تداولها .. بين الفعل وارتداداته حديث لاحق لا يتسع المجال له في هذه المساحة الا في اعداد لاحقة من الملحق .. هي بين ناظريكم وما دار حولها في القادم من الأعداد .

لأجلك يا صوريّه .. رفعت عالي الصوت
خذني العشق صوبك .. والروح مبليّه
عـزمـت انثـر لـك ..عـمرٍ بـقى يـاقـوت
تــخـيــري عـــقـدك .. وتـمـهـلي فـيّـه
يا اللي ذبحتيني .. وقت العصر بسكوت
حــلال دمـي لك .. عــذّرت م الـديّه
عينك رمي صمعا .. والرمش لي تابوت
لا غافري ابـويه .. ولا آمي هـناويّـه !!
في اولك تفـاح .. وآخــر مـداك الـتـوت
مـن ويـن ما جـيتـك .. تتبـهذل يـديّـه
لو ود وزير يعيش .. يرمس طبل فمحوت
ويـطـلّق سـويري .. ملـيـون جـنيّـه
يتـوصف بـحسنك .. الهـنجري بكـلـكـوت
الشامه بخـدك .. مـن اصـل هنديّه
زينك غلب هالزين .. ما تكفْي وصفه بيوت
وآنــا انـهـدم بـيــتي .. بسبّة بـنيّـه
لا جيت انا احفظك .. انسى واشوف النوت
وان جيت لك ناسي .. تتذكر خطيّه
البحر ود عمك .. ناعت على منعوت
اخذتي من طبعه .. في الروحه والجيّه
لا مـهتني شـربي .. ولا هني فالقوت
وكل من سألني قلت .. مـيّه على مـيّه
الحس بي غايب .. والعقل بك مبهوت
نـاوي اجيك لـصور .. وعـلت فبديّه !!
نويت لك نيه .. ما يردها غير الموت
الـموت قـرب لـي .. ومـا فـادت النـيّـه
الوقت ما ينفعه .. الصوت بعد الفوت
والسـاعـه فـيـديـني .. عسـما ورمـلـيّـه
هيّه على هيّه .. وباقي الحكي مفلوت
والقـصـه بـاكـملهـا .. هـيّه عـلـى هـيّـه
يا بنت ساحل صور .. الحسن بك منحوت
(اني) فدا هالـصوت .. واللـهجه شرقيّه
لو عشقي ذنب فداك .. يا مرحبا بالكوت
بـسـلّـمـه نـفــســي .. والـقـيــد فـــيـديـّه
(أني) سجينك لين .. يحشر براعي الحوت
ويـلين مـــا تـروفي .. وتـجـيـك حـنيّه
يا بنت ساحل صور .. السيِف بك مبخوت
يـكفـيـه عـز انـه .. تـدوســه عـــمـانـيّه
لأجلك نطقت القاف .. غينٍ وانا مكفوت
(صغلت) راسي لك .. بعمامه صوريّه !!