منت واضح في غرامك مره عندي ومره ضدي
كلما اوصل لي طريقك تنفتح ليه مجاهل
لما اطري في خيالك القى عندك كل ودي
تضرب الهاتف تبيني تحكي عن حبك هوايل
بس لما يدق قلبي واتصل اطلبك ودي
القى عندك كلمة آسف يا حبيبي لي مشاغل
لحظ عينك في حضوري بالفعل مشروع وردي
رامشن من زود شوقه عاملن فيه عمايل
والعجب منها يدينك خايفه لمسات يدي
لو احاول بس اسلم تحكي ليه اللمس باطل
محترق كلي عشانك تلهب الأشواق بردي
لاني قادر ع المحبة ولاني قاوي ع التجاهل
تلعب الأفكار فيني بين خذلان وتحدي
يا اجاريك بعنادك ولا اترك هالمسايل
الهوى نزهة ف ظنونك مثل ما ييجي يعدي
تحسب العاشق محطة لعبة او تحصيل حاصل
المهم ترضي غرورك وين ما وده يودي
تنتقل مثل الفراشة تفتكر كل عود مايل
ولا نا لي قلب صادق يشتعل من زود وجدي
به مشاعر تنتشي به يا بخت من كان طايل
