يضيق همّي بك و حزني يعزيك
كل المشاعر لك حزينه حزينه
ذكراك قلبٍ ماخفق يوم ناسيك
تنبض لك أشواقه وقمّة حنينه
الأرض تدعي والسما فوق تبكيك
لو يتكلّم هالشجر قال: وينه..؟!
وأصيح يا جدي كثر ماني آبيك
تركتني لعبة زمن في يدينه
اسمعنــــــي يا آبويَه وربي يخليك
احمل معي حزنٍ يضيّق مدينه
جف الكلام وكل هالناس تدعيك
حتى الطيور تشيّعك في سكينه
هذي الأماكن همها اليوم ترضيك
ياكيف أجاوبها وروحك دفينه
ماتنفع دموعي لو تهلّ ترثيك
دام القدر ما فيه شيٍّ يـــــــدينه
إيه أذكرك والشوق فيني يناجيك
وذرفت حرفٍ صادقٍ في حنينه
قلت بحروفي بعض من بعض مافديك
لعلّي اشفي حزن قلبي و انينه
يا جدي المرحوم يا(سيف) أبا أهديك
حرفي و قلبي مع دعاه و يقينه
ينعيك طيبك قبل هالشعر ينعيك
وكل الأماكن من فراقك حزينه
|
