كتلة القوّة

يا كتلة القوّه على قالب الذوق
ينزاح ذوقي لك بلا اي ّ قوّه
...
كل ّ الدلع مسكوب في عود ممشوق
ولا ّ دلاله ماكل ٍ كل جوّه
...

فـ المعجزات بـ هالتغنيج مخلوق
أشقر على أشقر بـ أول العمر توّه
...
يكسيه فرو ٍ عاطي ٍشكل مرموق
كنه سحاب ٍ والذهب به تموّه
...
ما قالها مياو ٍ ولو كان مخنوق
لو عاز شي ٍ رمش بالعين نوّه
...
نبرات صوته لا ..ولا ظن مسبوق
يشدني بيها اذا من تفوّه
...
طيشه مثل نار ٍ دعى العقل محروق
يضوي حماس ٍ للتسالي بضوّه
...
يطوي المحال و باب للخوف مغلوق
مـ يهاب واقع في أساليب طوّه
...
بينه و بين الطيش وعد ٍ و موثوق
لي بينه وبين الغنج كالاخوّه
...
خلا المرح يرقص على مسرح الموق
لا شفت لعبه للمآسي يتوّه
...
ما دام جوّ اللعب به مرتفع فوق
اللي تبي تسويه يا طيش سوّه
...
لان السما تفرح مَعَ حزة شروق
قلبي سماه و طلعة الشمس هوّه
...
يا ليتني اعرف بعض سر ّ هالشوق
لا من تلوى خيط يغريه لوّه
...
كنه يلاعب قلب و الخيط لعروق
قلب ٍ يوّده في فراقه تأوّه
...
أغلى من الناقه على بايع النوق
واكثر بعد من راعي ٍ عز ّ بوّه
...
ما بيع وده لا ..ولا سومه فـ سوق
صرح المعزه بالغ ٍ في علوّه
...
حايز على القوة مَعَ جانب الذوق
حايز على ذوقي بلا أي قوّه