صباح الأربعين

صباح النور والبسمه ..
يا أوّل حاره بقلبي .. يجيها النور
وقال الطير ..
يا أرض الحلم
يا ..
غصن اعشقه عصفور
أنا وانتي وعين الشمس
تبادلنا الهنا بالخمس
ومرينا على العالم
وقلنا بشوقنا الحالم
يا كل اللي يظللهم
غلاك .. بحيل نسألهم
وفيه أجمل من إنا نقول للدنيا
وإنتي افأربعين العز
يا غاده
صباح النور؟
وقالوا : يا صباح الخير
( على الله رزقنا يا طير )
ومروا كلهم مروا
ميادين الحياه بشوق
بهمتهم بنوك بذوق
ما انجرّوا
ورى جفن النعاس
وضيّعوا في ضفّتيه حقوق
صباح الغيم يا حلوة
إذا صبّح على وردك
وجيتينا بفرح وغرور
من قدّك ؟؟!!
تعرْفي الورد والنسمه
وخيط الشمس والعصفور
يقولوا لك :
وإنتي افأربعين العز
يا غاده
صباح النور؟
على سجادتي مريتي
وكان الخفوق يقول للدنيا
من السبعين عديتي
بكل الفخر والعزه
زرعتي في مدار النجم
للفرحه غصن زيتون
ونخله اتظلل العالم
واذا طاريك مر بحب
بلسان البشر صرتي
مثل سكـّـر
يذوب وحبـّـك الشاهي
ترى ما حد مثلك يجعل أفكاري
تخلي كل من حولي
واجاوبهم
أنا لاهي
ولو ياخذني المنفى
أغني لك

أنا المجنون يا إنتي بطينك واحرث الأسباب
عشان أزرع لك الخطوة نخل يجنيه خفاقــي
متى ماجيت انا صدري لقيتك تفتحين البـاب
كذا يعني بأن انتي سكنتي داخل أعماقـــــي
إذا غيري يشك اني انا في تربتك أنســــاب
عليه انه يطالع صورتك في داخل أحداقـي