حبّتين آدول ؟!! 

كلِّ جزءٍ من جمالكْ هو مَلِكْ

تسمحِ نْسمّيك مجموعة ملوك

سِحْر عينك مب طبيعِي وْ مََنـْحرك

مَبْ طبيعِي وْ مب طبيعي في هدوك

مب طبيعي إِنْتَ إِنْسانَ اوْ مَلَك

وَاصْلاً امّكْ عاقِرُ وْ عاقِرْ أُبوك!؟

بعترف لك وين لاقينك هَلِك

إِحْلمو الجنَّهْ وِ منّاكِ احْضروك!!!

حبتين آدول مع شاهي كرك

جيبهن لا جيت عندي آرجوك

خايفٍ إيدي إذا لمست يدك

م الفرح آجنّ وآخبِّرْ أُخوك!!!

لو على موتي ولا تاكل عِلِك

دام عِلْكِكْ تَتْفِلَهْ مع ريج فوك

إلاَّ كانِ انِّكْ تبي النَّحْلِ ايْهَلِك

وْ يِنْقرض من كِثْر ما ياكل علوك!!!

الحليوِ انْ ياك مازر مَشْكَلِك

يا حلاكُ وْ يا حلاتك يا حلوك

يالحلو سبحان من هو شكَّلِك

بك علامات العرابُ وْ في نحوك

كسرَةِ الخاصرْ وِ ضمَّة شِفِّتِك

وْ فتحَةِ عْيونك وِ مَبْسَمْكِ الضُّحوك

لو نَظَرْك اوْرُوبِّي يرطن كلَّمِك

قالِ أُفِّ الشيمَه يا ربّي عفوك!!!

كلّما مرّيت شرياني احْترك

لا تقطعه هدّي هدّي لِعْنبوك

وِشْ لَه تغرِي عْيونِي خَلْفِكْ تِتْبَعِك

إختصرها قولَ أباهَا وْ خِذْهَا دوك

هلَّـله هلَّـلهْ لا تغـادر منزلك

قفِّل الْغرفه إذا تسمح سموك

لو درو أهلَ الْخليجِ بْموطنك

إنشبت ما بيننا غزوة تبوك!!!

العسل والسّكَّرِ وْ سدَّ الْحَنَك

إنتبه لِخْوانِكَ.. آها  يذبحوك

حتَّى لَا تْحطِّ اسْمِكَه بْحوض السَّمَك

إلاَّ ذا تحمل حِسِنْ سيرَه وْ سلوك!!!

رمش عينك خيزرانَه.. وْ خَصْلِتِكْ

خيزرانَهْ خيزرانه في عدوك

لو يِضمِّكْ شخصِ إِرْهابي سلك

كان حِسْنِكْ طلَّعَهْ منْ هالشِّكوك

وْ لو تفاوِضْ هاليهودَ آبشِّرِك

لو تطالِبْ بَاسْرَى حِزْبَ اللَّهْ عطوك!!!

من يقول الشمسِ إِنْها  تِشْبِهِك

هَالْجمادِ اشْ جابَها لك يالملوك

أصلاً إهْيا من حلاكِ بْمَوْلِدِك

جت مِنِ الغيرهْ تسبّ أمِّكْ و بوك!!!