صباح النور..
صباح الذكريات العور..
صباحك وانتي اول بنت توقف بآخر للطابور
صباح أطهر عذارى الحيّ
تقوم الصبح (مصفوعه) بكفّ الـ(خيّ)..!
تروح المدرسه ودموعها شنطه
تحيي راية الدوله بضيقة نفس
تقبلها قبل يصحى شعاع الشمس!
تحل الواجبات بصوتها المبتور
ولا تكتب
ولا تقرا
وهي اشطر بنات الارض
تعرْف ان السما رايه
تعرْف ان الفقر ما له شغِل بالعِرض..!
تحب العاقر
العانس
تحب ثيابها المهتريه بْمخصورها الضامر!
تحب الناس
تحب اكذوبة الشاعر بكل احساس!
عليمه بالاغاني الفاتنه..
وبفتنة الفنان!
تعرْف ان المشاهير الكثيره ما تشيل لْسان!
صباح عروقها اللي تنتمي دايم لكل بلاد
تحبّ اللي نهار العيد ماتوا بحضنها الاولاد!
تحب الورد
والساقي
تحب اني اصبحها من فراقي!
صباح النور..
صباح الجاره الحلوه وابوها (الثور)...!!
تقوم ورمشها الاشجار
تنام..
وما يْتبقى بشارع الانسان غير (القار)..!
صباح الفقر يا (فطـّوم)
مساء الحب ما جرّب معانا بيوم.. (صحّ النوم)..!
صباحك (فوضة أموله) مع (الوسمي)
صباحك مكتبك..
شاي (الكرك)
وآنا..
صباحك يوم نتراضى..
ويرجع يزعل رْضانا..!
صباحك عام كامل وانتي بدوني
زعلتي وما معك مني هدية عيد
ولا (دبدوب)
لا خاتم
ولا رْساله انتهت سهم ويشق قلوب!!
صباحك حكمة العاقل
وعظم الحكمه المكسور!
صباحك طيش يوزن خطوة المخمور!
صباح الورد يا بيت الغلا..
يا عشه المهجور!
صباح الحب (فطامي)..
بعد بكره باكمّل لك عن العتمى
عن عيوني البصيره بمحجر الاعمى
تعالي يا صباح الخير
تعالي يا حبيبة شعري المغمور (فطامي)
تعالي بدفتري
ن
ا
م
ي