البارحه لاعاد ليله وطاريه
=ليله مضت لعلها ماتعودي
حضرت فيها لصك درب المشاريه
=ولا حشت منها غير نقدي وزودي
خطا وانا اللي في يميني مسويه
=وافرح علي اللي عليه حقودي
العايب اللي كل عيب(ن)وجد فيه
=راع العلوم الهابيه والهبودي
شين الفعول اللي قريبه هقاويه
=لو امتلا جيبه وبنكه نقودي
مدري وش اللي جابني في حراويه
=وانا بخيصن في كذوب لوعودي
عندي خبر باول حياته وتاليه
=وعندي خبر بنه هبود وجحودي
مفروض في بعض المواضيع ماجيه
=ماني على بعض الامورامحدودي
ياللي تحاول خايب الذكر ترضيه
=ما من ورا الانذال مكسب وفودي
لا ترضي اللي مايقدر ابناخيه
=اللي عليه يقدرون الهنودي
بع الردي وقلع مداه وضواحيه
=اللي تساوا غيبته والوجودي
لو هو من الاقراب لاعاد ترجيه
=انسه ولا تفكر لقربه تعودي
وخلك مع اللي طيب الفعل راعيه
=راع الكرم والطيب فعل وشهودي
الطيب اللي ماخسر من يخاويـه
=والطيب له دايم يحـث الجهـودي
كم واحدن ماهو بسيط بحكاويه
=وقت الرخا يفتل كبار العضودي
ووقت الشدايد ماتشوفه وتوحيه
=معروف طبعه بالمواقف شرودي
مثل الثعل لاراغ ذيله يباريه
=ادنا وحي كنه عليه امهدودي
الطيب للي طاب ذكر بماضيه
=ولاهل الوفاء ومعربين الجدودي
سناد ربعه بالشدايد وناخيه
=وللي رسوا لطيب مثل النفودي
ستر الدخيل اللي من الضيق ناصيه
=اللي لحل الكايدات امعدودي
كل(ن)ليا اقبل من فعوله ياحييه
=ومن رافقه يرقا بفعله سنودوي
فرقا الزمان اللي كثيره بلاويه
=اللي ذبح فيه البخيل القعودي
اللي به الرجال قله يارديه
=وصارت به الحرمه تحل العقودي
عزي لمن قله باهالوقت طاويه
=وماسد بالازم عيون الحسودي
وحظه برديان الزمن دوم باليه
=دايم عليه بكل هرجه شهودي
لو ان درب الصدق والحق يمشيه
=بينه وبين الصدق تبنا سدودي
|
