قصة البيدار

مــسافـر والـحنـين الـلي بـصدري قـيّد الـمشـوار      وأنــا فـي الـطايـره جـثه وقـلبـي سـاكـن بـديـره

يــاعــيضـه آه لـو تـشعـر بـغربـتنـا مـع الأسـفار      يــمرونــا بــشر لــكن نــعاف الــناس والــجيـره

أحـس الـشمس من كثر الحراره في الشعور تْغار      لهب صدر وتعب قلب وسفر ضيق ووجع حيره

تـمنـيت الـسحـاب الـلي كـشفـنا عـن سـناه خْمـار      جـعل من هامته طير ورجعت أرضي على طيره

هــنا لــو لــلغـنا فـي داخـلي نـاي وحـكي جـيتـار      تـصيـر الـطايـره مـسرح وإحـساسـي جـماهيره

ولــكن الــمســافــر صــاحــبي مــحتــاج للأذكـار      عـسى الله ايـوصّلـه ويـرد سـالـم مـن مشاويره

يــذكــرنــي رحــيلــي لــلســحابـه قـصة الـبيـدار      ســقى نــخلــه زمــن واحــتاط للأيـام مـن بـيره

شجر يكبر.. ثمر يظهر.. فرح يصفر على الأثمار      وجـا الـبيـدار فـي غـفلـه.. حـرق نـخلـه بتفكيره

حـلمـت وتـذكـر الـلي يـكسـر الـجره مـن الأفكار؟      عــلى راسـه يـسيـح الـحلـم وايـطيّر عـصافـيره

عـبث يـا صـاحـبي قـبل الـرحـيل انـقطّف الأزهـار      عـــبث تـــبحــر مــراكــبنــا بلا ربــان أو ديــره

عــبث غــصن ٍ تـدلّى بـالـثمـر نـرمـيه بـالأحـجار      وتــلقــانــا الــوجـوه الـلي رعـينـاهـا بـتكـشيـره

وقــفنــا بْمـعرفـتنـا دونـهم عـن قـسوة الإعـصار      وهـم جـتنـا نـسايـمهـم خـناجـر تـطعـن الـسيـره

فــمان الــسم يــا ثــعبــان عــلّم خـطوتـي تـختـار      وأنــا لــو صــابـني سـمّك بـقول الله لا يـضيـره

وهلا يـــا قــلبــي الــمفــتوح للأحــباب والــزوار      يـعيـشوا بـالـصفـا فـي الـداخـل ويجنوا أساريره

ولو صارت علومي غصن يابس واستووا له نار      يــشبّوا فــيه والله يــسلّم الــلي مـا حـرق غـيره

ونــعم لــلرمـل لـو قـالـوا نـسيـمه لـلعـيون غـبار      فـضاي أرحـب عـن الـلي حـدنـي أتـبع مـحاديره

سلام الـريـح يـا عـيضـه يـجي مع موجز الأخبار      حـمل قـلبـي عـلى عـلمـي وحـطّه وسـط لفجيره