ضمينـــــــــــي

[شاكر العلوي]

تحية للجميع

هذه آخر نصوصي اتمنى ان يعجبكم


ضمّيني في ليل التعب محتار له اكبر طموح
انه يشوفك طول عمره في امان وفي سلام
تتكاثري داخل عروقه حب يشفيله الجروح
يكفي يشمك كل صبح الصبح عطر المستهام
ياوردة القلب المعنّى ما وقف عطرك يفوح
في عنفواني اللي تمادى لين ضيّعه الكــلام
معتز بك امضي وانا آخاف عن عشقي ابوح
لنه مدى عشقي يساور حاسديني فلغــــــــرام
كلك فيافي للأمل يا الارض يالرمضا السموح
مكثر وجوه اتلونت سوت من غيومك لثـــام
اشرف ترابك من عبث ناس لمصالحها تروح
ما تنبتي الا الطهر لو تاه بأفكار اللئــــــام
واللي قطف وردك قبل ما تثمر ازهارك صروح
لا ما تعدى شرفة احساسك مواويل وهيــــام
الا وتطاول رغم قصره للتباهي دون روح
انه حبيبك الاكبر وكلٍ معه حفنة كــــــــلام
يَ بلادي ريحة تربتك انفاسي ياالوجه الصبوح
وفي ساحلك اتنفس احساسك يمامات السلام
فعيون اطفالك امل يزهر محبة ما تروح
وفيدين شيّابك عنا فدوه عطوك بلا مـــــلام
وانتي من اللي لك وفا لما تبادالي الوضوح
لك صار جنحانٍ تعدتبك شبابيك الغمـــــام
واحسن من اني انزوي لو شفت بك جرحٍ انوح
بقول للنفس اصلحي واصيغ من الهمه حسام
اقطع به حبال الوهم مهما بتغريني السطوح
وآظل اصعد خطوةٍ خطوة واغادر هالظلام
للنور اللي في سماك يلوح من عين الطـَموح
اللي انتسب لك مفتخر بالحب يا دار الكـــرام .(تم)