استضافة السلطنة الادبية للشاعر \ علي الحارثي

[فاطمه القمشوعيه]

\

القصيدة الحاصلة على المركز الأول في الملتقى الأدبي الخامس بولاية صور لعام 1999م

الروزنامة



مثل الـــفراش اللي أنتحر بأحضان قنديل الوعـد
ـــــــــــــــــــــــــــــ تتساقط أحــلامي على هالـــــروزنامه وتتنتحر

باكر تجي ،لحظة وتجي ،يمكن تجي لين السهـد
ـــــــــــــــــــــــــــــ يذبح على جــــال الغــــلا حلم التـلاقي المنتظر

ماهي على خبرك طعـون اللي تجيبك لي عــمد
ـــــــــــــــــــــــــــــ ولاني من اللي ينتظر لــو طـالت الظلمه فـجر

هالأرتعاش اللي سكن ضلعي وفي ضنك بـــرد
ـــــــــــــــــــــــــــــ ما غيـر زفـرة مارد الشـوق العظيم المحتضر

ينام في جفني السهاد ويصحى في ضيم وكمـــد
ـــــــــــــــــــــــــــــ وأنا علـى نفس المكـان أدّور ْلظلمــك عــــذر

كثيـــــر ظلمك يا لسنين اللي تعب فيك العـــــدد
ـــــــــــــــــــــــــــــ كثيـــر أمهلك الســراب وفيك أضناني الصبر

لو هالحـــزن ما شالته أكتــــــــــاف عشّاقه سند
ـــــــــــــــــــــــــــــ باكــر سماء كونه تطيـح وينكسر ظهر النصر

من تنتشي الغيمه أكيـــد أن الغـــــــلا يصبح بلد
ـــــــــــــــــــــــــــــ ومن تمطــر الغيمه أكيـد أن الثرى ينبت زهر

ما يلمس ْجروحي سوى أيـــــــد التي منّي تعــد
ـــــــــــــــــــــــــــــ ولا يمسح دموعي سوى من يشتهي عندي السهر

تعبت أبحمــــل هالشعـــور اللي على كفيّ سجد
ـــــــــــــــــــــــــــــ ســــافرت به لـوسادتي ليــــن ْبمعاليقي أستقــــر

يا ذابله ما بين صــــدق وكــذب وأحـلام وعهد
ـــــــــــــــــــــــــــــ هالروزنامه ْبســـــاعتي ذابت تمنينـــــي أنتظـر

إلى متى هالأنتظار يـــــــذّوب ْشمــــوع الوعد
ـــــــــــــــــــــــــــــ إلى متى حلمـي بحضـن الروزنــامة ينتحـــــر