الشعر الشعبي : عدّت على خير للشاعر عبدالحميد الدوحاني

  عدّت على خير
للشاعر عبدالحميد الدوحاني

عدّت على خير/ ربك يفرج الشدّه
مشكور جرحٍ نبت لي داخل أضلاعي

عدّت عقب ماخذت صبرٍ وصل حدّه
كنت أتوقع تجيني العاشق الواعي

كنت أتنفس عطر شوفتْك واشدّه
وأحبس عليه النفس وأزيّد أطماعي

وأشهق على موعد اللقيا عقب مدّه
ما كنت أظن اللقا ناوي على ضياعي

مـع شوفـتـك كانت الأقلام مرتدّه
كانت تحاول عشانك تطرق أسماعي

ومع شوفتك عاد هذا القلب من قدّه
يشوفك الحب والهوجاس والراعي

ومع شوفتك ماعرفت الصبح وش حدّه
يقطع سوالف مجاديفك عن شواعي

كتمــت هــمٍّ يخلـــّي الروح منهــدّه
عسى مع الوقت تتماشى مع أوضاعي

البارحة والنجوم تكمّل العدّه
عـديتـها لين ما نامـت على ذراعي

مع كل نجمٍ.. يجيني سهم وأصدّه
لين انكسر ترسي وزادت بي أوجاعي

والبارحة ما بقى لي شيٍّ أردّه
كل إتجاهات قلبك تطلب وداعي

والبارحة جرحي اللي كلهم ضدّه
ما طاع يعكس تجاهاته عن شراعي

من حضرتي لين أداري قلبي وندّه !!
ومن حضرتك تبتسم لي وتلوي ذراعي !!

وعدّت على خير/ ربّك يفرج الشدّه
ماكنت أظن بوجودك ينهي إبداعي

درب السلامة .. ترى صبري وصل حدّه
وش حاجتي في جروحٍ ما لها داعي !!