الشعر الشعبي: ذاكرة أسامينا للشاعرة اصيلة المعمري

  ﺬاكرة أسامينا
أصيلة المعمري


القصيدة إلى روح الأرض وﺬاكرة أسامينا :



يا أسامينا ..
وتخنقني العبره ...لا قالوا أسامينا
واذكر أن الأسامي .. ريح ..
وأن الأماني ريح ..
ولا نادوني .. أطيح
وأرجع أطيح ..
أبسالك بالله ..هي حلوه أسامينا ؟
هي حزينه بعدها جدا أمانينا؟
اتذكرك
اتذكرك يوم النداء صوتك
ووجه المنى صوتك
وكل الهواء صوتك
خذتها الريح ..
وان ما خذتها الريح
خذاها الموت قدامي وقدرت اصيح
~



قد قلتها لا زاغت النظره و انا بينك
يا كيف آبنـسى العمراللي نمى فينا


اشتاق لك، كل شي هنا غايب بعد عينك
واصبر وتبحر بي بعد صبري أسا...مينا


وينك وأنا أنشد \"خواتمنا\" عن ايدينك ..
عن سالفة صوتك لـ سئلتني أغانينا


كم بستره جرحي وكم يكشف عدوينك
يوم انمضغ طعم الفرح ،بـ أتعس ثوانينا


راحت وهي مثل الضنا ، كانت حوالينك
مثل الحمام العذب لا مرت مراسينا

حتى العزا كذاب ، ما جاوب على \"وينك\"
احتاج لك ، يا هالصبر تشفي مأسينا


تشهق حزينه هـ الأرض من طاحت يمينك
فجاه رحلتي ما انتظرتي نص تلاوينا


تبكي \"حيولك\" والعذر في فقدها زينك
يا جدتي ﺬا الموت ما يسمع أمانينا.


من مننا يدين القدر يوم القضا دينك ؟
صعب الغياب المر ، و صعب ٍ به تواسينا

أستئمنك يا هالخبر علم عناوينك
أنها فنر هالبيت لـ سودتت منافينا


وصاحوا الجن ليلتها ..
وما بقوا ناس
وانا اسمعك يا ابويه تقول \"اماه \"
تقول \" أماه \"
تعبت أصبر
وأمر أنسى
أشم ريحة هـالمكان اللي انملى باليأس
بكت \"الأسرار\" .. قدامي
وكبيره لا بكت \"الأسرار\"