مخاوي الذيب

إذا ودك تــفرق بــين كــل رجــلن وأصــحابـه      نـصيـحه.. ارفـعه دايـم عـلى ربـعه وهم حوله

كـذا طـبع الـرجـال الـلي لـفعـل الـخيـر كـسابه      عـلى حـب الـرفـيق الـلي مـثلـها دوم مـجبـوله

عـدا طـه وصـحبـه والـميـمم صـوب مـحرابه      لكل حكمه كسر.. والمصطفى كل خير يسموله

وأمــا عــن تــفرق صــحبة الــدانـي فلا تـابـه      مــخوة مـن دنى طـبعـه مـع الأنـذال مـخذولـه

وانـا طـيبـت نـفسـي عـن رفـيق الـذل وأقرابه      وكـل من هو على شكله.. ولو من عنده ميوله

قـضى عمره على مغنى.. ورمسه بين مغتابه      قــطع ربــه.. بلا غـايـه.. ولا أهـلن ويـدعـولـه

فـلوسـه مـن بـعد ديـنه.. عـلى حلاق وثـيابـه      ومـرجـلتـه فـرقصه.. أو يدور في عصى يوله

مـخوة ذيـب أهـون دام عـينـي صوب مخلابه      ولا صـاحـب يـدلـس مـر نـفسـه فـي حلو قوله

تـرى الأصـحاب فيهم سلوتن ع الضيق غلابه      ومـنهـم ضـيقـتن تـسوى بلاوي نـفس مـعلوله

مـثل صـاحـب تـريده ف المصيبه مسند ولابه      وصـاحـب لـلضـحك والـتسليه عن حال مملوله

وصـاحـب يـستـر عيوبك ..وكنه بالأصل عابه      وصـاحـب يـرتـقب عـيبك ..لعله يرضي فضوله

وصـاحـب كـلمـا شـفتـه تقول اليوم وش جابه      وصـاحب تشتهي شوفه بكل صوله وكل جوله

وصـاحـب يـفرحـك لـو تـحتـمل هـمه وأتـعابه      وصـاحـب يـحزنـك لـو كـان هـمك أكـبر حموله

مــعادن اكـثر الـصحـبه تـكل مـن أول مـجابـه      ويـصفى لـك قليل اللي على الصدمات مصقوله

كـفى لـك صـاحـبن واحـد.. ولـكن أنـت أدرابه      لــزمـته بـالـعقـل والـمعـذره والـديـن مـكفـولـه

يـعز نـفسـه عن الداني..وصدره واسع رحابه      تـشوفـك ناس في قربه رجل يمشي معى دوله

بـعيـنه اسـمكـم واحـد..صـبع اوسـط وسـبابه      نـسي سـرك..فـعل قولك..نفس همك ومشغوله

على قدر الصفات اللي حوى من زين ترضابه      ولا يـكمـل صـديـق الـخيـر مـهمـا زانـت فعوله

ولا مـنه تـعدم لـك صـحيـب الـخيـر تـحضـابـه      تـعود تـختـلي مـع نـفسـك الـلي فـيك مـهمـوله

ترى صبرك على الوحدة..تحاسب نفس توابه      ولا صـبرك عـلى صاحب خلا من دين ورجوله