صبح آخر

ما يمسح دموع الذهاب إلا تباشير الإياب

لا فاق من أمسى شتات لصبح آخر يجمعه

المركب اللي قايده الموج عمره ما يهاب

لو يكسر شراعه رفع للريح بعده أشرعه

إن هاجر الود القلوب اتصير من عقبه خراب

كذاب من قال الهوى للخل الاول .. مرجعه

ما يجبر آآلام الغياب ان طال لحظة اقتراب

لا صارت سيوف الجفا والبعد فينا موجعه

الوقت ينسي صاحبه وان طال به درب العذاب

لابد من ساعه تجي بالغير عينه تقنعه

القحط دايم ينتهي ما يمهله وبل السحاب

والباب عمره ما غفل حاجه تعنت تقرعه

واللي عن الحاضر تراجع للورى بالحلم غاب

مصير حلمه من صروف الدهر يلقى مصرعه

من كان ظنه للأسف في سامي الأخلاق خاب

ما يشتري قلوب ٍ فـ سوق الحب هي مسترجعه

من جار به ضيم السنين الين جرح الأمس طاب

ما اظن رجله للمكان اللي طعن به تدفعه

قيل البياض بهيبته همس المشيب الى الشباب

وقيل الهوى فــقلوبنا راهب سكن في صومعه 

الحب دربه لا امتلى بالغدر واشواك وضباب

خطوات من يمشي عليه تكون دايم مسرعه 

لجل النهاية تقترب ويعود للدرب الصواب

ويجفف بطيب الحياه اللي جرى في مدمعه