إشارة مرور

على لسان طفل فقد والديه في حادث مروري..

كنتْ، حلم..وكانت أحلامي مدينة

وكنتْ ـ يا ما كنتْ ـ وأيامي مدى

كنتْ أشوف (النور) وعيوني حزينة

وكنتْ أحط (الخير) في دربي سُدى

والصباح اللي حضنّي في حنينه

ضاااع حتى نام في عين الردى

كنت عصفورٍ مشاغب..

كنت طول الدرس غايب..

كنت أحاول قد مـ قدر أنْ يكون الوقت لاعب..

كانت أحلامي طفولة..

وكل أيامي بطولة..

طفل يلعب..

في سكيك الوقت راغب..

ينتظر ما فات عمره..

أب يحمل عنْه عذره..

وأم يسكنها الحنان..

تضحك وتملا المكان..

وترتجي الرحمن يتخرّج ولدها..

وتنستر بنْتها ولا تلقى هوان.

بالأمس..كانت وكان النجم غايب

والسكيك أعذار وعيونه مرايا

تحمل بيدها هدايا لطفل ذايب..

حُب..والضحكة تلفّ ابها الحنايا

مرت..وكان الردى يملا الذوايب

مر..مثل البوم يا شؤم النوايا

يا رجاء الأطفال لي قد صار خايب

مر مثل البرق يحرق هالهدايا

طاحت..وطاحت عليْ كل النوايب

يا شتات الموت في كل الزوايا

من أنا؟..يا موت..يا أم المصايب

شارعٍ طاشت على جسمه دمايا

يا أبوي..ويا دماء ست الحبايب

اختلط دمهم..بدمعي يا شقايا

والصمت خيّم على ذاك المكان..

جف حتى ريق أطفالٍ صغار

شفتهم..حلم..وسراب..

شفتهم..زحمة غياب..

شفتهم..لحم وقطع رمل..وزجاج

شفتهم..ملحٍ أجاج

يا ضياع العمر في ليل الصدى..

ويا غياب الباكر اللي ما هدا..

وين أروح..وّوين أغيب..وّوين أعود

الجهات السود غطّت سكّتي

والفرح لا جا (صغير)* ولا هو (عود)*

كلها الأيام تشبه حرقتي

واللعب والحضن والقلب الودود

راااح ويّا الموت.. خلّف دمعتي

اندفنت يا بوي في عتم اللحود

وليت أمّي ناولتني لعبتي

يا الضمير الحي وقّف

ما كفاك اللي خذيته في ثواني

ما كفاك اليُتم لي خلّف وراءه..

ألف طفل..وألف أسرة دون عايل..

ما كفاك الشارع اللي قد خذلته..

لين صارت كل خطواته قنابل..

يا الضمير المات..وقّف:

لو تركت النور في قلبي دقيقة

بس تشوف اللي ذبحته في ثواني

حطّمت عمري وصرت ابلا حقيقة

يتّمت حلمي وأنا واقف مكاني

ضيّعت مني غناياتي الرقيقة

يا ضميرٍ مات في صحرا زماني

هات ما خذْته..ترى هذا طريقه

لو عرفت (اشلون) من بعده أعاني

·       إشارة للعيدين