| جف ينبوع القصيد وامحلـت وديانـه
وافلست كل القرايح والسبب مجهـول |
واهدمت ريح الهموم بخافقي جدرانـه
وانسفت قصر العواطف والدماء سيول |
ما بقى مني صحيح ٍ وافقـات اركانـه
ما بقى غير الحطام وبيـرق ٍ منشـول |
شفت همّي باسملّـي بـارزه نيبانـه
ما حسبت ان ابتسامه منقذ المخـذول |
لين بيّن لـي نـواه واغلقـت بيبانـه
واغلقت فيني حياتي ولا نفعني قـول |
لو عرفت اللي اعتراني بدّعي نسيانه
بس ما بنسى طعون ٍ سيفها مسلـول |
علّتي علّة غريب ٍ شاق شوف اوطانه
وانتظر حكم القدر فالمحكمة كم حـول |
بس ما بان القضاه ولا اْعدلوا ميزانه
ما بقى له غير ربـه يفرجـه بحلـول |
حالتي حالة جريح ٍ زعزعوا بنيانـه
ما حد ٍ طب ّ الجروح ولا غدى مقتول |
حالتي يرثى لها والكل كف ّ اْعيانـه
ماحسدني حاسد ولا دز ّ لي مرسـول |
يا كحيل العين ياللي مخضّبات ابنانـه
شوف حالي وتْعرف ان الجفا مسؤول |
ليش جفواك وخفوقي غارق ٍ باْحزانه
ليش بعدك والفواد بشوفتـك مشغـول |
كنت لي حب ٍ يروّي خاطري باْمزانه
كنت لي عشق ٍ سقاني مـ الحلا معسول |
كنت مثل النجم سكّْنه الفضا باْحضانه
وافتخر به وارتفع في ناظريه يجـول |
دم خفاقي عطيتك والغـلا بـه زانـه
بس ما صنته وصرّحت بدخول عْذول |
يا حسافه مات حبك واندفـن باْكفانـه
كنت احسبنّه مخلّد ما دريـت يـزول |
بس توّه زال وتْشتـت وقلبـي هانـه
وانعدم لاْعظم جريمه فعلها مـ يـزول |
وانـْقبر عند الذي له سابقـات خيانـه
وانتهت فيني حيـاة ٍ بابهـا مقفـول |
وابتدت قصة قصيد مْذهّبات اوزانـه
اكتبه كلما طرى لي وْلا غزتْه مْحول |
