القبر

[إبراهيم بني عرابة]

السلام عليكم ورحمة الله وبركاته


صوتي شحيح وما يوديني مسافة لو تكلمت

وحدة غريبة زادها الصمت

وحشة يشيب الراس منها كم تعلمت

لنّي تألمت وتألمت وتألمت

وش فيه صوت الذيب من عقبه ونا مــــ الخوف ما نمت

بالهم سلهمت

للصمت سلمت

ثم سال خوفي حبر بحروفه تكلّمت


يا مشغل(ن) دنياه علم وفلسفة وجبر
إحسب حساباتك وحطّ ليومك عتاد
بينك وبين الآخرة ما هو سوى شبر
يا كيف تغْمض عينك ويهنالها رقاد
فكّر ترى بكره وسادك ظلمة القبر
والخاسر اللي ما جهَز للقبر بوساد
كم ناس تدخل قبرها وأعمالها غـُبْر
والموت لا يا صاحبي ما يلبس حداد
ما يردعه وقت الحصاد وموعده صبْر
أو تكسره لا جاك يسعى كلمة وكاد
الموت لا جا يا وليفي يكسر الكِبْر
بالله وش نفع الخشوم بوحشةِ سْواد !!
كم ناس تولد عــــَـ البسيطة وشالها زُبْر
ماهو بحاصد لو بغيت تقول حصّاد
نفس(ن) وحيدة بالسكون وما لها خُبْر
إلا عملها ما لها غيره أبد زاد
وحشة غريبة ما يقفّي عنها دُبر
يمسح كآبتها جَهاز(ن) دربها حاد
للّي تجهّز بالصحيح ودلّه الحِبْر
للبيت لي يحوي فقارى الناس و اسْياد
ولــــْ يفهم التاريخ بعد الدين والجبْر
يحسب لميعاد التوادع ألف ميعاد


يحسب قبل يبكي بوحدة "ليتني صمت

عن كلّ شر وبالفضايل تحزّمت"

يا ليتني لمت

نفسي وسلّمت

لله أمري وعن لي راد ما نمت

يا ليتني لو بس تعلمت

من كل خطا و زلّة بها طحت وتألّمت

لكن نسيت و ذا أنا ذالوقت ما رمت

وحشة... ظلام... وبالمواجع تلجّمت

وش عاد تنفعني علوم الجبر

ما هي سوى سطر(ن) مليته حبر

ما عاد ينفعني هنا إني على حسابي تندّمت

صوتي شحيح وما نفعني لو تكلّمت