نصوص من المهرجان

[محمد الراسبي]

- - أحمد محمد شهاب البلوشي
- - الشعر الشعبي
- - أغنية للريح


يا صاحبي
ما يشبهك غير الأمل
غير الحمام
أشياء من خلف الأرض
مدري يترجمها الكلام
ولا عجز ...
مدّيت كفي للبدر
هاك العمر
عطني دقيقة من يديك
اقطفلك الدنيا قلب
يشتاقلك.. ويموت فيك
يا صاحبي ....
تاه الحكي
تاه الغياب
والليل قيثارة سهر
حد الجنون

ما باقي إلا يشربك
نخب وجنون
مابين حانات الطهر
يلبس عيون
والليل ما يعرف ينام!!
في غربتي
طاحت من الغيمة بلد
ارجع أفتـّـش عن فضاي
اللي ملا عيني سهر
عن نجمة ٍ كانت تسامرني ،، أناي
عن طاولة .. ما كانت إلا تنحني
لما يجاريها الكلام
وتنكسر ...
.
ويْمرني في زحمة الضيق عذري
يطرق علي الباب .. يتكسّر الباب
بدري تجي يا صاحب العذر بدري
ما جيت إلا داخلي ماتوا أحباب
شبّيت لك ضلع الندا .. نور عمري
(مديت لك كفّي أزاهير وأعشاب)
جيتك من أطراف الوفا .. طفل يجري
يطرق عليك الباب .. وتسكّر الباب!!
.
ماتت قلوب
والهم ما يلبس ثياب
عاري يفتش عن وطن
مابين دخان وعذاب
يا صاحبي ....
اكبر مصيبة في الحياة
تقطع يدينك للوفاء
وتمد ... ما تعرف تشيل
حتى الحلم
جاته بدور وخانته
واتكسّرت كل الجهات
والليل ما يعرف ينام!!!
.
والليل يكسيني من الوحدة ثياب
صاغ الوعد من ضيق الأيام صبري
راحل عسى الأيام تهديني كتاب
يمكن يصحيني من الحلم .. مدري
الوعد كاذب لكن الود غلاّب
مجنون كنت اخذ من الريح حبري!!
.
عطني من الضحكة بلاد
واتركلك عيوني هنا
وارحل على متن العمر
يا صاحبي !!