لمن يريد مشاركتنا ماضيه

[أبو المؤيد]

هلاااااا أسعد:

ما سمعت المثل إلي يقول: ما دائماً تسلم الجرة:d

تعرف أسعد من المواقف إلي تندمت عليها وما زلت أتندم، كانت في سن المراهقة، كنا أنا وربعي نركب سيارة في شارع عندنا يمر بين المزارع، وأنا أكون راكب بجنب السائق وماسك خيزران، كل ما نمر على مزارع أجنبي أرخطة بالعصى و نحن بالسيارة مكملين سيرنا، منهم إلي يأخذ الأرض، ومنهم من يطيح من فوق السيكل، وثالث يركض خلفنا بس ما يلحقنا، وكنا نسوي هذي الحركة بشكل شبه يومي، وطبعاً كنا نتبادل الأدوار.

في يوم كان الدور علي ، وأشوف ثنين من الجنسية الأسيوية راكبين على سيكل وأحد، المهم أخرجت أيدي من السيارة وماسك العصى وأرخط إلى راكب بالخلف رخطه طاح يتلوي من الألم من قوتها، وإذا بالثاني يلاحقنا بالسيكل بأقصى سرعة عنده وما قدر يلحقنا طبعاً، وكنا مبسوطين ونضحك.

بعد ما صليت العشاء وقفت مع شباب ثانيين خارج المسجد وجابوا السالفة وقالوا: قريب المغرب مروا شباب بسيارة على ....... وأبوه إلي كان راكب معاه بالخلف وضربوا الأب بالعصى لدرجت أنه الحين منوم بالمستشفى من أثر السقطة و منكسرة أيده وبه رضوض كثيرة، والصاعقة كانت أنهم قالوا أن علاجة بيكون بمبلغ كبير ما يقدر ولده يدفعه، جاتني قشعريرة بجسمي ورحت البيت وأنا أفكر وأفكر، وجاء وقت النوم وأنا ما غمضلي جفن، وعاهدت نفسي أني ما أكرر هذي الحركات مرة ثانية.

بعد يومن وبعد صلات العشاء وقف واحد من المصلين يحثهم على التبرع للرجال المسكين المنوم بالمستشفى، رحت وبعت الفملي مالي عشان أساعد هذا المسكين، وكانت الفملي غالية وايد عندي، والغريب أني أول مرة ما أتندم على بيع شيء خاص بي.