لمن يريد مشاركتنا ماضيه

[أسعد المحرزي]

يا حبيبي يا مصطفى .. ما تستفزنيش أكتر من كده !!

يا حارق الفئران .. يا نيرون شناص

وين الريسي عنك .. الإطفائي العظيم

المهم عزيزي .. دام جبت طاري الجمبزة .. خذ هاذي:

كنا أخس صف في الإعدادية العامة .. أربش شباب في مسقط .. لما يرن الجرس .. نقلب الصف بكبره (كباريه) تقول عرس بتان.. ما صف !!

المهم في يوم من الأيام .. وفي غمرة أفراحنا وإحتفالاتنا .. ألمح لك مدير المدرسة (تتذكر القاتل في مسرحية شاهد ما شفش حاجة .. الخالق الناطق).. وأسمعه يزمجر في الكوريدور .. والشباب في سكرتهم يعمهون .. وشال في يده زوره طويلة تارسة سحاليف.. الشرار يطاير من عيونه .. قلت واغيابي اليوم .. أصرخ شباب .. جاكم الموت .. والشباب ولا على بالهم .. قلت أشرد بجلدي .. وخليهم يغيبوا ..

طويت يديني على رأسي.. ونمت على الطاولة

دخل المدير .. وصرخ .. كل واحد يقف .. وأخوك (نايم) .. ويبدأ من أول الصف .. أفتح أيدك .. وأسمع الزورة تسولف فوقهم .. وصل عندي .. وزميلي يصحيني (أسعد قوم المدير جاي.. وأنا مطنش ..) .. قال له المدير .. سيبو.. سيبو .. ده غلبان يا حبة عيني.. أفتح أيدك أنته يا بابا.. وصاح (الجلد) فيه .. ويكمل على بقية الصف .. شي رفس .. شي هيدات .. وشي سوبلكسات .. هوجن نعم .. ما مدير

عاد يوم طلع .. الصف كله بين قتيل وجريح .. وأنا الناجي الوحيد من حادث الإرتطام

وتم توجيه تهمة الفساد الإداري لي علنا ... واسطة .. ليش أنت الوحيد اللي ما داسك المدير.. ونحن لعب فينا كورة !!

بعد كم يوم .. عادت حليمة لعادتها القديمة .. وعاد زمن الأعراس .. وهاذي المرة .. شفت الأسد جاي .. وأسوي نفس الخطة .. لكنها للأسف باءت بالفشل .. لما وصل عندي قال لي : أصحى يا بابا هو أنت كل يوم تعبان .. أصحى خد لك ألمين يصحوك. عينت على الشباب وقلت لهم .. اليوم تعلن برائتي من كافة التهم المنسوبة لي .. حسبنا الله ونعم الوكيل .. وصاح الرقيع فيني

[أبو المؤيد]

هلاااااا أسعد:

ما سمعت المثل إلي يقول: ما دائماً تسلم الجرة:d

تعرف أسعد من المواقف إلي تندمت عليها وما زلت أتندم، كانت في سن المراهقة، كنا أنا وربعي نركب سيارة في شارع عندنا يمر بين المزارع، وأنا أكون راكب بجنب السائق وماسك خيزران، كل ما نمر على مزارع أجنبي أرخطة بالعصى و نحن بالسيارة مكملين سيرنا، منهم إلي يأخذ الأرض، ومنهم من يطيح من فوق السيكل، وثالث يركض خلفنا بس ما يلحقنا، وكنا نسوي هذي الحركة بشكل شبه يومي، وطبعاً كنا نتبادل الأدوار.

في يوم كان الدور علي ، وأشوف ثنين من الجنسية الأسيوية راكبين على سيكل وأحد، المهم أخرجت أيدي من السيارة وماسك العصى وأرخط إلى راكب بالخلف رخطه طاح يتلوي من الألم من قوتها، وإذا بالثاني يلاحقنا بالسيكل بأقصى سرعة عنده وما قدر يلحقنا طبعاً، وكنا مبسوطين ونضحك.

بعد ما صليت العشاء وقفت مع شباب ثانيين خارج المسجد وجابوا السالفة وقالوا: قريب المغرب مروا شباب بسيارة على ....... وأبوه إلي كان راكب معاه بالخلف وضربوا الأب بالعصى لدرجت أنه الحين منوم بالمستشفى من أثر السقطة و منكسرة أيده وبه رضوض كثيرة، والصاعقة كانت أنهم قالوا أن علاجة بيكون بمبلغ كبير ما يقدر ولده يدفعه، جاتني قشعريرة بجسمي ورحت البيت وأنا أفكر وأفكر، وجاء وقت النوم وأنا ما غمضلي جفن، وعاهدت نفسي أني ما أكرر هذي الحركات مرة ثانية.

بعد يومن وبعد صلات العشاء وقف واحد من المصلين يحثهم على التبرع للرجال المسكين المنوم بالمستشفى، رحت وبعت الفملي مالي عشان أساعد هذا المسكين، وكانت الفملي غالية وايد عندي، والغريب أني أول مرة ما أتندم على بيع شيء خاص بي.