الامس قالوا واصل السلطــانــي

[بو ميحد]

قال شحاري:

قم يا حمد سير وتوكل عـــــانـي
هات الخبر من ديرة الالمــــانــي
الامس قالوا واصل السلطــانــي
عمت نواحيها سرور اعلومـــــه
عمت ودارت في البلد خروفــــه
والناس تجهش بالفرح من شوفه
دمعن تزغرف والعيون اتشوفه
وامست شوارعنا فرح مزحومه
امست من الفرحه عمان امليحه
كم شهر كانت بالسرور اشحيحه
باتت تكابر للحـــــــزن واتزيحه
الله رحيم ودارنا مرحـــــومــــه
الله رحيم ودارنــــــا محروســه
اشفى و عافى للــــزمن قابوسه
راعي اليدين الطيبه الملموسـه
معلــــونه المده ولا مكتومــــه
معلـــــــونه المده بلا كتمانــــي
ادعيت له بالصحه والعمرانــي
وايطول عمره سيد الازمانـــي
تمت وقيفان الشعر مختومـــه

رد بو ميحـــــــد:

حيا براعــــي المنشده حيا بــــه
الشــــوق فيه وباينه في ايهـابـه
سيـــدي رجع سالم وربه جـابه
خذها تفضل جبت لك معلومـه
خذها وقابوس العرب تبكي له
دمع الفرح سوت غدير امسيله
بالعافيه صبح وعصر ندعي له
سوت شغل ما قصرت هالشومه
سوت شغل وامن الفرح بكونــي
واتزغرفت فيها دموع اعيونـــي
ساعه هبوط الطائر الميمونــــي
حسيت نفسي بالبكاء ملزومــــه
حسيت به واجب وطن نادانــي
لجله نثرت الدمع كالغدرانــــي
الثاقب الفكر الرحيم البانــــــي
بالحب انشا دولتن منظومــــــه
بالحب اسس في النفوس امحبـه
سيد وطنــــــــــا نعشقه وانحبه
ننشي حصون القافيه من سبـــه
تمــــــت نهديها لسيد قومـــــــه