بالفاتحة بدينا والفلق والناس

[عامرالناعبي]

محاورة في الرزحه بين الشاعرين حمود الرواحي وجمعه العلوي
جرت بتاريخ 17/10/2014 في جروب اهل الرزحه

حمود:
بالفاتحة بدينا وبالفلق والناس .
وكذاك باﻹخلاص النية واضحة .
وتبت يدا الكافر وصاحب الوسواس
وان جاء نصر الله لقينا مصالحه .

جمعه:
على النبي صلينا و زال اﻹلتباس
و بالتوبه أقسمنا و تسمى الفاضحه
و بآية الكرسي بطلنا قفول الراس
القول واضح و المعاني شارحه

حمود:
سبحان ربي مذهب المرض والباس
وساقي عباده الكوثر شربة سانحه .
وبالكافرون السورة دقت اﻷجراس
ووجوهم تصبح قبيحة وكالحة .

جمعه:
بآيات ربي با بطّل سحر ﻷنجاس
و بقدرة الله كل موذي با كافحه
فياسين آيه تحبس الغوي حتباس
يلين ما يصرخ و يرجو مسامحه

حمود:
في جنة الفردوس طايبة اﻷغراس .
للي قرا الماعون بروحن صالحة .
ايات ربي تهدي ف شدة اﻷغلاس .
وقت الشتا والصيف ويوم الرايحة .

جمعه:
يحمود جابل لتضيّع علينا الساس
بعدنا فبحرن ما قطعنا سابحه
لولو و زمرد فالدنيا ترا و الماس
خلك فارض الله الوسيعه الفاسحه

حمود:
سير وتوكل بنشارك عرب جلاّس .
هذي الدنا فيها التجارة الرابحة .
واللي تجبر ويضله العدو الخناس
ﻻقى المثل بأهل الفيال الجارحة

جمعه:
يلي عشقها ردته على اﻹفلاس
مـ تروف به لنها غرور و جامحه
العقل زينه و كل ثوب ن يله لبّاس
خذ لك حذر ياﻵدمي م الطامحه

حمود:
اشهد كلامك صادق والمثال قياس .
كم امّتن فيها غدت ما فالحة .
والويل للهمّاز طاحوا بارتكاس .
يوم التكاثر ذاقو شربة مالحة .

جمعه:
ذاك الخبيث اللي على النبي سيّاس
ساس المكر لكنّ ربك نافحه
يحسب بماله ينّه كاسب النوماس
و فاﻵخره بيكون وسط اللافحه

حمود:
من حاد دربه ويمشي بالوحل دوّاس
ﻻ بد من يبكي وتسمع صايحه .
والقارعة توضح عيشة الملا البلاّس
واهل النعايم في العطر وروايحه .

جمعه:
يمشي فهالدنيا و فالقلب هوجاس
همّن على هم الهموم اطارحه
المؤمن يصيبه و لو صابه البلا ﻻ ياس
يرضى بقسمته و الولي هو مانحه

حمود:
يعرف مصيره ويعرف خاتمة اﻷنفاس .
ما شي زيادة لو خيولن جامحة .
بالزلزلة ختمنا وعذرن يا ابوجرناس .
النوم غازلها العيون الفاتحة .

جمعه:
شويخ يغني في وسط ارض مكناس
يا ليتنا شمنا الثنينه انصافحه
هيش با نسوي غلّقت الهوي بترباس
يالله بعمل صالح يزيل الطالحه