ترانيم الرحيل

[راشد المشرفي]

ترحــــــــــــــــــــــــيب""
مجنون شعر وفكري المبدع أجن
ودّه فرايد غير راشد ما كسبها
وأن كثرت الأبيات أو راحن وجن
لي حسبةً ما حدّ غيري قد حسبها
كلّه لجل من حمّرت ذاك الوجن
الي تبيع الناس دامي من نسبها
حسنً فريد وخلق فيها أنسجن
أبليس من زود التقى والدين سبها

يا عازف لقلبي ترانيم الرحيل
عقب الفراق أش عاد باقي نذكره؟!!

حسبي على الي جابلك خيط الفتيل
ومن غيرته خلا سمانا معكّره

يا كم تشمّت بي وهوعابر سبيل
مدهاه هالعاذل وعقله ممكره!!

العذل فأس وحبنّا مثل النخيل
كسّر جذوع الحب يمّك أشكره

وأخترت حل البعد ماترضى بديل
وصاحبك في لحظه تبيعه وتنكره

كنت أحسبك لي ظلّ في حر المجيل
وكسّرتها غصونك بصوره مبكره

هذا جزاء حبي وذا ردّ الجميل
جرحك على راسي وواجب أشكره

منّه هقيت أن الوفي كنّه بخيل
كيف المحبّه تنقلب بغض وكره!!

وتحبنّي ولا العكس نفس الحصيل
فالحالتين أسمي تراك بتذكره

وأشتاق لك أدري ولكنّي أصيل
ما أطقّ باب الي فوجهي سكّره

وكان الشرط في رجعتك أصبح ذليل
المرّ أهون من غلاك وسكّره

هذا مطارالهجر وأبعد يالخليل
ما دام للفرقى شريت التذكره

وهذي هي الدنيا وتعطيك الدليل
ما هو عشان الشكل سموّها كره