ريـــاحــــــــــــــــــــــــــش

[عبدالحميد الدوحاني]

ريـاحــــــــــش

هذا الوطن لا جاش يطلق سراحـش
مــرّي على منفـاي واتذكّـريــني

خلي الحــدود تشـــم ريحـة نجاحش
وخلي الخضار يحمّر شفــاه فيني

قصيدتي .. من شل فيني جناحش !!
غـــير القلوب اللي تروح وتجيني

قصيدتي .. لا ضيّقوا لش مراحش
أبقى الفجــاج الواســعة واسكنيني

قصيدتي .. لو عــاندتني رياحــش
لسوقــها لــش قافيـة .. صدقيــني

قصيدتي .. لو جيتش بذنب فاحش
مدّي يدين العــفـو واستغــفريـني

قصيدتي .. ما اسودّ فيني وشاحش
دام الشعر معجون من صلب طيني

قصيدتي .. لو دمّروا لش سلاحش
تبقيـن طـعم الإنتصــار بسنينــي

أنا الغرور اللي يضمّد جراحــش
وأنتِ لي أنفاسي وسجدة جبيني

وهذا الشعر ماغاب والليل ياحش
ســدّل جناحــه وانثنى يحتريني

وهذا الشعر نادى وحيّا فلاحــش
وخلّاش لوحة كاملة وسط عيني

يا شعر أنا ما جرّحتني الفواحش
جيتك طهــارة والقلـم في يديني

لي قلب يشهق من مرارة نواحش
ولي بيـــرقٍ لوّنتـه براحـتيـني

قصيدتي .. ما نام فيني صباحش
دام القوافي استيقظت من أنيني

وهذا الوطن لا جاش يطلق سراحش
قولي لهم شاعر لقى الناس فيني

والله لو ما القافية جات ( آآآحش )
لمدّها لش للضحى .. صدقينــي


عبدالحميد الدوحاني