(كلما جاتلي تحلى)

[إبراهيم بني عرابة]

(كلما جاتلي تحلى)


رسايلها غرام و شوق
وكلما جاتلي تحلى

يزيّنها رقيّ و ذوق
و عين(ن) بالحلا كحلى

تقل منها الحسن مخلوق
أو ان فيها الحلا يحلى

برمش(ن) عالرمش مطبوق
يــ حلو رموشها الخجلى

تغطي بوردها المفروق
عيون(ن) ناعسة ثملى

وشف(ن) يخجل المنطوق
إذا مر به على عجلى

يذوب بسُكرّه ويبوق
من طروفه دفا و يسلى

جميلة والجمال فروق
فرس وبها الأصل يعلى

لها بأحلى الخصال عروق
أو ان منها نبع دجلى

وذا بشط الفرات بروق
عرفت ان غيرته حبلى

مثل غيري غدى محروق
لأني سيْدها الأغلى

لأني دمعها والموق
أو اللي لا بكت يبلى

وذا ضحكت سحاب يسوق
ويمطرني فرح عبلى

ليا عنتر بيوم يروق
غدت من فرحها هبلا

حياها كم رفعها فوق
و دوم بهالحيا تغلى

كأنّه هو لبسها طوق
غدت به أذوق وأحلى

بدهر(ن) ما بقت به حقوق
خرج عن سنة المولى

بقى للدين فيها شروق
ولا تغيّر ولا ولّى

طهرها ما المسه أي عوق
أبد ما تنحني ذبلى

بوقت(ن) للفساد يتوق
وياكم باق واستولى

وياكم مــ الورد مخنوق
و صار الموت به أولى

ولكن ذي ملاك تفوق
بحلو وصوفها المثلى

حلا ما شابهه مخلوق
و خُلق بزينها يعلى

ونا ياما كواني الموق
بدمع عيونها الكحلى

تغيب وفكري المسروق
نطر مرسالها بــ عجلى

تمّر بخصرها الممشوق
هـــُ حلم(ن) دوم يتعلّى..

.. بفكري والسما لي فوق
ونا صابر لجل تملا..

.. رسايلها بحبر الشوق
و عطر انفاسها الخجلى

و تلفيني بحبّ وذوق
وهي كلما لفت تحلى