قبر الغرام

[مُعاذ السليمي]

قبر الغرام






على أعتاب حارات الحنين اللي متلت بغياب
عزمت أحفر هنا قبري قبل لا تنتهي سنيني

وجيتك شايل أكفاني ورسايل كل حبرها تراب
سكيك الشوق ضاقت بي ولا منفى يداريني

هلابي فبرزخ الحسرة،هلابي فموطن الأحباب
م بين العشق وأشجانه وبين الكبريا وبيني

نويت أهرب من الماضي الكئيب بوحشة الأغراب
نويت أنزف شواطي ذا الحنين اللي ملت عيني

ينام الليل في حجري ويفتح للوجع أبواب
ولا حان السحر وأذن فجوفي شوق يكويني

توضيت بطهر عيني وطيفك كان لي محراب
وجهرت لجنازة صمت يملأ كل دواويني

وذاب الكبريا فيني مثل م الدمع فيني ذاب
وسلمني الى قلبي مدام الحب هو ديني

أبطعن صمتي فأرضك عسى مني الحكي ينساب
وسكوتي بذبحه قربة بصوتٍ كل يدويني

تحرر جرح من صدري،صرخ في حضرتك ثم طاب
أحبك مووت يا غافل تعال أرجوك
وحويني

تعال وعانق عروقٍ تبدل دمها بعتاب
وأروي قلبي الضامي واسقي لي شراييني

إذا صمتي كتم جرحي وعوراتي كستها ثياب
وش اللي يحجب شعورٍ غدا أوضح عناويني

بروحي العارية أكشف ملامح حبي الأواب
وعيني كنها مراية تبوح بكل ما فيني