فرقاك يكوي

[عبدالملك البلوشي]

فرقاك يكوي

من هو يلوم الشوق لا من طريتك
يامن ترد الروح فيني بذكراك

فرقاك يكوي في خفوقي .. يريتك
تشوف حالي من بعد يوم فرقاك

لو كان لك قيمة تقدر شريتك
ماعشت لحظة في حياتي بلياك

سجيت عني .. رغم ذاك إحتريتك
ما في ضَلع وسط الصدر ما تحراك

لو كان لك درب مقدر سريتك
ما شفتني تايه أدور محياك

يا صاحبي ماني بماخذ هريتك
القلب يصدح بالهوى ماهو بفاك

بإسم العشق.. يا ليتني ما غريتك
شوف التلاعب بالعشق وين وداك

بعدك يهون .. إلا الهوى ما بريتك
ماني بلاقي شخص مثلك وشرواك

لو في مثيلك بالغلا .. م عتريتك
بإحساس صادق من خفوقي ترجاك

بس ما دريتك يالوفي .. ما دريتك
تهجر .. وتكوي بالهجر قلب يهواك

ببقى أحبك والعهد إن م ريتك
تدعي لقلبي كثر ماهو تمناك

عشتك بصدقي .. وسط قلبي قريتك
واليوم مدري من ف قلبه تقراك