رقمك قياسي .. بالجفا والصد

[ميلاد اليماني]

حطمت رقم(ن) قياسـي بالجفـا والصـدّ

باقـي ضلـوعـي اذا ودّك فحطمّـهـا

يكفي جروحـك عروقـي تحتهـا تمتـدّ
بعدي مـن الامـس اجراحـك ارمّمّهـا

ياليتني كنت فـي قلبـك بقايـا .. حـدّ
كـل الاحاسيـس مـن عطفـك تيتّمّهـا

ما كان جفني شكـى لـك قلّـة المرقـدّ
والنوم لو هو جبل ما سطـاع يهزمّهـا

احيـان كثـر اختنـق اهمـس واتنهـدّ
اسـرق طيوفـك وعاتبهـا واحلمّـهـا

يا سيدي كل ما اشتاقك ومـا لّقـى حـدّ
لحظـة صفـا بيننـا بالطيـن تختمّهـا

تعـرف بداخـل كيانـي احسبـك معبـدّ
وانت القسى فيك قطعـه مـن جهنمّهـا

البحر لـو كـان مثلـك مستريـح المـدّ
كان الشواطـي بـلا شاعـر و يلهمّهـا

كانـت سيـوف القبيلـه تكتفـي بالـردّ
مـا دام هتلـر عـدو الامـس مجرمّهـا

كان الحروف مـا نـوت لليـوم تتأبجـدّ
واصبح فصيح العبـاره مثـل اعجمّهـا

كان الورود .. ما تذوب في مبسمك والخدّ
والبعثره مـا لقـت مـن هـو يلمّلمّهـا

لو كـل ريشـه بهـا الالـوان تتجمـدّ
تزعـل وصوفـك بـلا فنـان يرسمّهـا

ما دام سهم الهـوى فـي قلبـه اتسـددّ
ما فـاد لوصحـت بالاوجـاع اشتمّهـا

ما انا مغـازل وكلـي لـك بجـد الجـدّ
والعشق دوله وساجي الطـرف يشكمّهـا

ياليـت الانفـاس فينـا صـدق تتجـددّ
وام الزعـل لـو تجينـا مـا نكلمّـهـا

خوفـي سمانـا بهـا الغيمـات تتلبـدّ
وطـول بعـدك مـع الايـام يردمّـهـا

حطمت رقم(ن) قياسـي بالجفـا والصـدّ
باقـي ضلـوعـي اذا ودّك فحطمّـهـا

بقلم

اخوكم
ميلاد اليماني