(بلادي والعمر والشوف )
لعيونك الشوف
و انتي لناظري مرسى
لو تأخذين العمر لبعيد المدى يرتد
وتبقى لك أنفاس ما تبرد
من علم الليل يعكس للسماء ظله
حتى تبين النجوم لقاصد المرسى
أعطيني الصبح ولحاف المسا والنرد
وأرمي لك العمر من انفاسي الصحرا
من باب خوفي عليك بداعي حضوره
زاد بصداك الرجا وأن زان بك مسرى
(ينصي) وراي المنادي ينتظر دوره
أدري لعمري عليك يسيل لك مجرى
لمعانق الصبح سمعي خطوة عبوره
حطي لي الضي لو شوفي بدا يضرا
عـلى وجــــودك و انتي تنثري نوره
وقتي عطيتك عطيني من يدك أقرا
بـــاقى دفاك وعلى تاريخك سطوره
على يدينك عطر
سماك الماطرة نخلي
زرعت أنفاسي بطينك
بنت فيك الرضا والطيب
سقيتك من حنين الصدر
عطا قلبي وتغريدي
انا لك والصدى يشهد
تعب صوتي وتنهيدي
أحبك كثر ما احرث ترابك والسماء زرقاء
أحبك كثر ما أفسل نخيلك والجبين يفيض
وأحتااااج لك أحتاج
كثر البعد وسنيني
ما (ينشري) الوقت / عمر الوقت ما يشرى
لكن عشانك بعـد العمر وشهوره
محتاج لك حاجة ٍ تنساب من حدرى
يوم المنادي يصيّح خلف منجوره
لعيونك الشوف لين انفاسي الصحرا
يفداك دمي / وأشواقي لك بحوره
سليمان الجهوري