[سعيد محمد البلوشي]

وتظن بغيابك أنا و قلبي بخير
و ان العمر لا راح من دونك عمر

و إني بعد وياك إلى نفس المصير
ترمينا الذكرى و لا نلقى مفر

ما عاند الأشواق موعدنا الأخير
آخر لقا ما بيننا همّ و سهر

بين الأماني العابرة كنا نطير
و نخطّ أسامينا على أوراق الشجر

ما تذكر اللحظات في عز الهجير
كم قلتلك ما يشبهك إلا المطر!

و اليوم ما شفنا من الحب الكبير
إلا سواد الليل في قاع الجمر

خليتني للهم .. للغربة أسير
هاجر مع الأسراب حبك و اندثر

وين الغلا كلّه و "أحبك للأخير"!
وين الذي لا غبت عيّا و انكسر

أو وينها أشواقك و "أنا ويّاك غير"!
بالله كل هذا رميته للقدر

و تظن أنا طيّب و إنْ قلبي بخير!
لا والله لا طبنا و لا عندك خبر