سديم
لـ : يوسف البلوشي
نشف ريق الحنين اللي ذبحني ولا قدرت القاك
ذبل وجه القصيد الي كتبته وشاخ من دونك
رحلت ودربك الحيرة / على أرض الوهم مسراك
طفيت اخر قناديل الغرام ورحت بسكونك
طريقك وجهته هذا المدى ، لأقدامك الأشواك
ولي من ذابل الورد بطريقي صورة جفونك
رحلت وللوله فيني مداين كلها تفداك
مرايا الغيم لو طالعت القى صورة عيونك
وانا في داخلي طفلن يحبك لو ندهته جاك
يجيك بلهفة احساسه يجيك ويمسك ردونك
عيون(ن) ماقوت بعدك ومرود كحلها ذكراك
تمنت تهتني شوفك وتينك مرجح غصونك
انا ذاك الوحيد الي تشبث والعمر مرساك
نجا من قسوة ايامه ولكن ضاع ف سجونك
انا ذاك السديم الي تشتت في مدى الافلاك
يبي يتمحور في كوكب ولكن ضاع من دونك
عتيم(ن) زاد طغيانه يسيل ويغمر الشباك
ولكن شمعة احساسي تموت وترفض تخونك
جروحن في وسط صدري تربت من غد ر يمناك
علامك مارضيت انك تجي وتخفف طعونك!
طريقن للشقا خذني طريقن للجفا وداك
على الله تصدق ظنوني وعلى الله تخلف ظنونك
مدام ان الكبر دربك اكيد ان العمر يظماك
لثم عمري سرابك يالغياب ومات من دونك
|