[سعيد محمد البلوشي]

يـــــا أنــــــاي





متى يا وجْه الصباح العابس بْتشرق سماي
ـــــــــــــــــــــــــــــــــ تواعدني كلّ يوم وْ لا عرفْت ألقاكِ وين

تعبت وْ ماءِ الفرَح تائه غزتْه بْحور ماي
ـــــــــــــــــــــــــــــــــ تعبت وْ لا جابتك عينٍ تقاسمها الحنين

أنادي يا حلْم ضايع ليتك تْردّد نداي
ـــــــــــــــــــــــــــــــــ توارت حتّى النوارس من يبادلني الأنين!!

تخيّلتك مثْل جذْع النخْلِ صامد يا أناي
ـــــــــــــــــــــــــــــــــ و اثاري من طيحةِ الأيّام ما ترحمْ سنين

مجاديفك هالرميمه البائسه تْجدّد شقاي
ـــــــــــــــــــــــــــــــــ ولو قايضت وْ بنيت شْراع كِنّا مبْحرين

غريبه منْ جرّ صوته ما الْتِفَتْ لَه كلّ جاي
ـــــــــــــــــــــــــــــــــ و الأغرب كلّ الذي شفْتهْ ولا ألقى مُعين

وحيد بهذي المدينه المظلمه وْ فاقِدْ دواي
ـــــــــــــــــــــــــــــــــ كِساني الضيم وْ تناسوني شِباه المسلمين

أمانه يا سامعين الصّوت له وَدّوا رجاي
ـــــــــــــــــــــــــــــــــ أسير هْموم وْ فقيد أحبابه منْ يَهديهِ عين!!

كفايه..يا قلْب لا تجْزعْ و ظلْ صابر معاي
ـــــــــــــــــــــــــــــــــ كثير أللي هُمْ عن دْروبك تراهم راحلين

عذابي فاق الذي شفْته وْ تغنّتْبه شِفاي
ـــــــــــــــــــــــــــــــــ " لك اللّه يا هالزّمن راحت ليالي الأوّلين"!!




-سعيد البلوشي-