السلام عليكم ورحمة الله وبركاته
لكم ..
كلام الصمت
و فاض الصمت , , من كثر السكوت اللي ملى فمّي !
وأنا أدري ( كلام الصمت ) , , أوجع من ( كلام لْسان ) !
زمن طاحت معه رايات أبوي وْخالي وْعمّي !
و تاهت اتجاهاته , , و لا له وجهه وْ عنوان !
زمن يبكي على الماضي , , وأمسح دمعه بكمّي
بعد ما قد عصرته من دموع الذل و الخذلان!
وش تْفيد ( الكتب ) لو يحتفظ بيها , , ( رجل أُمّي ) !؟
مثل ما صفّت " أمتنا " على أدراجها " القرآن " !
قبل نشرب ( فناجين الذنوب ) المُرّة , , " نْسمّي " !
و قبْل نصبّ ( فنجان المحاسن ) , , نعزم الشيطان !!
و لي صاحب , , يذم اللي , , يسلي وقته بذمّي
زرعته في صحاري قلبِي وْ أثمر " وفا و أحسان "
على صدره , , سكبت اتعابي وْ فرّغت له غمّي
و اعطاني عيونه لو بغيت أبكي من الأحزان !
قطف لي من عبير الودّ , , ورْد يْطيب له شمّي !
أخذ بيدي الى درب الرشاد , , وسكة الأيمان
وأخوي اللي حسبته لي " دوا " , , ما أحسبه " سُمّي "
تركني بعد ما علّم يديني , , تنسج الأكفان !
و شاف انّي ( أصارع وحدتي ) , , بسْ ما وقف يمّي
و هو يدري بأنّي لو ( أصارع وحدتي ) , , خسران !
أُخو يوهبني انفاسه و هو ما جابته , , أمّي
و اخو يسلبني أنفاسي على رغم اننا أخوان
وأخو , , ألقاه ( ظهري ) يوم يثقل حملي و همّي
واخو ألقاه ( همي ) يوم ظهري منهك و تعبان !
حشى , ماني معارض يا أخويه شربك لْدمي
و لكنك تبى تشْربْه وحْنا في ( ضحى رمضان ) !
حمود المخيني