مساء الورد
اهديكم قصيدة من أنتاجي المتواضع عسى أن تلامس ذائقتكم الرفيعة..
طنش وخبيّ غرتك عن عيوني
وأبعد مدام البعد راحة لقلبك
وأهجرني واتركني وحيداً بكوني
عادي أصير المنكسر دون دربك
كان احتياجي شيء مثل الجنوني
وكنت أكثر احتاج أني أكون قربك
لكن قلبك للهوى ما يصوني
هجرتني وطيّرت م القلب سربك
يامورد الخدين لطفاً وهوني
رد ّ الأمانة كانك أعلنت حربك
أول تجي ظميان تبغي مزوني
وأسقيك صافي الود وأفرح بشربك
واليوم كنت أبغاك للروح عوني
لكن خذلت القلب لي صان حبك
لكن أمانة يابعد كل كوني
أبعد ما دام البعد راحة لقلبك
وابشر ولو تبغي بعدها عيوني
تفداك روح اللي انكسر دون دربك