|
رد على طلب الصايغ وسالم الريسي نموذج من شلات المسبع والميدان
يا عمان غني فرح بالعيد وحضوره طيبي فعهد الذي خلاك مسروره سهل وجبل رددي بالطيب معموره واحات خضراء مع الأفلاج تتناغم والبحر يحكي علومه للقلاع الشم عن فعل أجدادنا واللي بعدهم تم قابوس زادك فخر وبالحق منصوره مريت يا شوق دارك والوقت ماسي وتذكر القلب وقتن كان له ناسي وتشاعلت بالحشى نيران حياسي قلت الصبر يا قلب ما طاع يتصبر من زود ما به لشوفك بات يتحسر يسامر نجوم السماء والطير يتخبر ويرسل سلامه لكم لن هب نسناسي مع نفحة العيد والمشكاك والحلوى برسل تهاني شرات المن والسلوى : وبرسل سلامن يطفي حرة البلوى واجب نعايد هل المعروف والجوده : وننثر لهم ورد والزايد على زوده : ما كل مخلوق برد هاجس الفوده : داي ودوايه وطبي من سكن ع لوى هلت ليالي الشهر والناس قالوا عيد : كلن يغني أبفرح والقلب عنده سعيد : ويبادلون أتهاني قريبهم وبعيد : وانا دموعي على الوجنات نضاحه : من فقد ناسن عن الأوطان من زاحه : من دونهم ما لقيت الأنس والراحه : وكيف الهنى والسعد ساعة تكون وحيد |
تابع لردود على طلب الاخ سالم الريسي قصافي أو همبل مسيرة أوهبية والبعض يقول قطفية لوداع والكاين تمام :يهل الوفاء والطايلة بنهم عاجل بالمشام :وافراحنا متواصلة يلي دعانا نوصله : رغم على كيد الحسود نحن رجال باسله : ما نهاب من حشد الحشود هبوت قال أحمد بن سعيد بامزروع الشنفري سبحان من طلع السماوات العليه : وبسط لعبده فالآمل طول الحياتي ذلحين صب النقد في ليله هنيه :يبغى لها كتيب ينظمها بياتي رد محمد بن سعيد النقيب الله يخلق ما يشاء في ذى الدنيه : وسط المدن مكن جبال الراسياتي نحن الذي نقراء حروف المشكليه : من هجوها باتعرف كمن لغاتي |
تابع ما قبله من ردود نموذج من زرحة اللال العود محاورة بين عامر بن سيف بن عرابه و خصيف بن مسلم باتت تخيَل عيني مبرقن لواح : خولن مشرق ماتسوق امخيلته يسقي منازل عزاء والست الملاح : اِلى وطن ليلى محيل اخسارته خصيف بن مسلم قبلك نخيَل خولن من سبعة وضاح : يمطر على منزل كثير وعزته وعلى منازل ليلى نرجس وتفاح : وكذا المغربي ما اتّغير ريحته عامر غيدن رعابيبن غماهيجن رداح : سكرى بلا صهباء فوادي راحته وباطرشك يالهدهد ياحلو الجناح : بلغ تكاسير المثل وصياغته خصيف جردن سلاهيبن ترادي بالوشاح : لن عسعس الليل المسير اتثبته تشبه على حلو العرامس والظباح: لن وجَّهن صوب الكميل ودولته محاوره في نايحة المطوع أو القصيرة بيني وبين الشاعر محمد بن حميد الحارثي: خميس يا السلطنه يا جنة الحور :يا موطن رجال السياده يوليو السعد لك شعشع النور :ورب الولي زادك سعاده محمد أول بحايي بجمع لحضور :راعي المثل ياخذ مراده عمان الكرم والفعل مشهور :طول الدهر سيره فزياده خميس يا الحارثي بنعدّل اسطور :وبنخص به دار القياده دارن لها تاريخ مذكور :وعنه الخبر عندي وكاده محمد قابوس أحيا كل مأثور :والشعب نور له بلاده من جود كفه دافق نهور :والخير نجنيله حصاده خميس بجود الشهم كل شي معمور :ومجد الوطن وثق عماده يوم اللقا والبندق يثور: كل خايفن دايم سناده محمد معنا رجال ف بر وبحور :والجو نكشف له سواده مايهمنا ف العز مخسور :ولايهمنا الدرب وبعاده خميس نمضي بحق الله ودستور :ومطلوبنا نيل الشهاده ويوم اللقا في راين وشور :صفن حوى علم ورشاده محمد مجد العماني ضارب جذور :دايم على صهوة جواده من فعلنا متزلزله صخور :وقبض السلب نعرف زناده خميس يلنا سوابق وين مندور :منهاب مالخصم وعداده فينا العزم يزداد مقدور :والسيف حن أهله وحفاده محمد ذكرت قلبي بذيك لعصور :عشنا على قسوة عناده ولا كان حدن يشكي قصور: مرتاح ماالهم ونكاده خميس كل وقت له ناسه ومثمور :يمضي على طيبه وحقاده اشوف الحلو بالمر معصور :وعلى الولي دايم سداده |
تابع الردود السابقة نماذج من أشعار الفنون العمانية المغناه نماذج من قصافي النايحة البوشرية من الموروث باوادع اربوعي :سامع ومسموعي سري واسراري :يالكوس سيريبه ومتكسرة ضلوعي :وروايب اصبوعي من قل شطاري :غابت يدي غيبه من الموروث باوادع الغالي :لي حاله من حالي قفى الهوى شبابه :يو ناس مو الحيلة رعدن وزلزالي :فجو السماء العالي برقن ف سحابه : وتسوقه امخيله من فن العازي سميت بالمولى القدير : فردن صمد ماله مشير يعلم بما يخفي الظهير : والكون في أمره استقام والكون في أمره مطيع : وصلوا على الهادي الشفيع في يوم ما ينفع وكيع : فاز الذي صلى وصــام فاز الذي نال المنى : وفي طاعة المولى سعــى بيكون في راحه وهنى : ويعيش في أعلا مقـــام ويعيش في نعمه وسرور : ما بين ولدانن وحــــور أتباشره بطيبه وحبور : وتخاطبه بهمس الكــــلام وتخاطبه بقولن جميل : يشفي فــــواد اللي عليل ويرجع صوابه والدليل : في موقفن فيه الــــزحام في مهرجان العيد عيد : كل عام في نهجن جـــديد إيلمنا قريب وبعيد : في محفلن سار أبنظــــام في محفلن فيه الحرف : تبرز مهارات السلـــــف فاقت مناعيت الوصف : في ظل من قاد الزمــــام في ظل من قاد البلاد : بالعلم وأبطرق الرشـــاد من حكمته نلنا المراد : رجل المواقف والســـلام رجلن يحل المصعبات : في يوم حـــــل النايبات الله وهبه حسن الصفات : العالم وقــــف له بحترام العالم بأفعاله شهد : يوفي بما قــــــال وعد يحسب حسابه للبعد : أمواقفه تشهد تمــــــام أمواقفه حسب الآصول : وصلوا على الهادي الرسول يشفع لنا يوم المثول : يومن لها حسن الخـــــتام خميس بن جمعه المويتي |
تابع لنماذج شعر الفنون العمانية نماذج من فن الطارق على الهجن رابي وتربيت : اعرف بنادجهن من الشوف غير الأصايل مول مجنيت :وبيت الأصل م شوف معروف الهجن تعطي كل ما عطيت : ورد الجمايل شي موصوف يا ما حلى العزبات لن جيت : وحنت حواشي الهين بالروف ترزن لشوفك كل مضويت : شروى الذي للوصل مشغوف تطرب لسير البعد لسريت :توفي ولو في قسوة ظروف بسم الهجن اعزي وانا عزيت :شروى الذي يعزاك بسيوف يا ما عليهن كم شديت :ومشيتها في وقت لصيوف وكل الوفا في الهجن لاقيت :وجنيت منها كل موصوف لشاعر محمد بن حميد الحارثي دن قلبي طارقن دنــه :صـوب فن الشعـر ورموزه في ضميري غارسن فنه : مـن زمان وحــافظ كنوزه عهد ثابت مني ومــنه :انجدده ونـزيد في حــوزه وياخذه بزاغورن وسنه :خاطــري ويفسـر لـغوزه للذي بالود مشقنـــه :غرنجين راجـحـــن روزه يا شبيه السولــعي كنه : فز ملقنيص لـــي حـوزه بريف برن يسري بنه : من جداه النفس مهــــزوزه ويعل نون مرعده دنه : يهل جوده وما يله خـــوزه نموذج من شعر فن الونه شوف الهجن ليسـلي :وغير الهين ينمل تشبه هلالن هـــلي : ساعة عليّه تهل شروى الضبي لن فلي : يومن تكون تجل |
تابع الرد على طلب الاخ سالم الريسي نماذج من شعر الفنون العمانية المغناه من فنون البحرية (أنديما) اهلا وحيا الله اهلا وحيا الله : وصلك يشرفنا يا سيدي والله وانعاهدك بالله وانعاهدك بالله : طوع الأمر نبقى طول الزمن والله تاريخنا واضح تاريخنا واضح : يشهد لنا موج لفعالنا شارح نقطع محيطاته نقطع محيطاته : والحمد للمولى عدنا بخيراته بالعزم والهمة بالعزم والهمة : يوم البحر طوفان القلب (م) يهمه نبحر رجا خيره نبحر رجا خيره :(ع) النجم مجرانا والنايله وديره قول وفعل شاهد قول وفعل شاهد: ما ننثني للريح وألنا الصبر ساعد امضي لك الطاعة لك سيدي الطاعة: أرواحنا المركب وقلوبنا شراعه فن بحري غدران من سابه غدران من سابه : وبالماء حياة الكون والروح تحيابه داري نبع صافي داري نبع صافي :متوشحة بالجود والثوب لي وافي كل نايف عالي كل نايف عالي : قدامك وقف خجلان يا موطني الغالي شكرا لقايدنا شكرا لقايدنا :يلي بناء التطوير وحافظ عوايدنا نماذج من فن المرنجوحه (المريحانه) من الموروث مريت ع القنطرة وريتها تجري تجري على الغاف والغفغاف والسدري طلع الثريا يطالعها نجم واحد وحسن الثريا جمالن فاز به واحد التويبع عشقها وأصبح من جبر فيها وم الحول للحول يتأمل يلاقيها لوتخالف السير مصيره يرد للواحد تقدر تسوي دجل من عود فرفينه وتقدر تسوي من الدخان لي شيله وتقدر تلم الخضر بالكف وتشيله ومن كنت عاجز تبعد والستر زينه مناذج من فن التشحشح نماذج من الموروث ولد البدو علق سلاحه وخلي رماني بدون زلة خان العهد والسد باحه عقيتني في مدهويه متشوفني طايح وحيران وسلمى الدني ومرت علية وطية الجديدة وسرعيبي شليني مسكد لعودة عند الدخاتر والطبيبي وسمعت زاجر في رويه ويا ملحلى كوش المنطل ويا ما زهى فوقك صبيحة الجاهل طلب شكليت فصحون اكليت العنب والخوخ كله وما لذ لي غيرك يزيتون ما معي من مال حمدان ولا فلج راعي سباحه يوم لا شواويع الجريبه أبغي العذر منه والسماحه البا بديت القول مني والتا ليت لحروف بعراب ويلحاضرين وأنا بنغني هذى الدني وهاذ شراها سلمى الدني جلابة أحوال ثارت تلاعبني بعصاها لي من بكيت لتلوموني والناس تبكي من بكاها صابر وفضحتني عيوني ساعة وداع الزين تميت حاير ولا عندي ذهوني معرفتني حيا ولا ميت بيت الجديد منقوش بابه يستاهله راعي الكرامه وفي نقشته زود كتابه بنقرشك لمباه لغضه وطلبت لك أم المعاريس كرسي ذهب ونعال فضه باكورة العشاق لانت وأمحبتك في وسط قلبي وكل مقدمت يو ناس زانت ساكنه وترعى حشايه وظلعين م الجنبين بانت نماذج من فن التعويبه من الموروث يو طير طاير حط : برسالة رسالة : وفوق الرسالة خط الطير ما طيرك : لول فحكمك: واليوم حكم غيرك اسحل بسكيني : ومن كثرت الشوق : هولة تبكيني والغيز يتجلجل : وروقت مجاهيد : رمان وصفرجل قهوه قليتوها :ومن نظرة العين : روحي خذيتوها وقليه لمحترقة : وأنا نطلب لبريان :ساعة بدت فرقه هنن تبى تهنن :لمرحنه أبرود : ولمشاركة تجنن طيرا يلاغي الطير: وغلية عليه : كلمة صباح الخير |
تابع الرد السابق نماذج من شلات فن الميدان الساس الذي وثيق ماينهش :لو عاصف الريح شد وزاد الغي بحكم والحكم فني : وصوغ المناطــــل لها فني وحشن بلى أسنان ما ينهش : لمن فاعل الخير قوته وزاد ـــــــــــــــــــــــــــــــــــــــــــــــــــــــــــــــــــــــــــــــــــــــــ الخوص الذي جاف ماينسف : صوغ الحرف والمثل فرضه ما كل رامي الهدف شله : وتابع مثل من يشــــل شلــــــه وبرن ممديوس ما ينسف : لو المنادي طلــــــب فضــــــــه ـــــــــــــــــــــــــــــــــــــــــــــــــــــــــــــــــــ الشبك اللي مطواي من مده : ذي فعلت اسعيد ولا أحسان راعي العلم ننشد وخبره : فاز الذي جابلي خبره سألتك أنا سأل من مده : من مذهب الجود والاحسان ـــــــــــــــــــــــــــــــــــــــــــــــــــــــــــــــــــــــــــــــــــــــــــــ غيرك يجوال أصبح من : الصاحبي أيسير لو لايم أزقر بصوتك بناديهم : واهل الفضايل بناديهم شوفوا الذي كياس أصبح من : زاده وزن زود لولايم ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ درب المسافر يحوج زاد : وصحبة هل العلم معروفه صافي الدرر خوك شي غالي : وبو يفعل الخير شي غالي جميلك علينا يصاحب زاد : غرقنا فطيبه ومعروفه ــــــــــــــــــــــــــــــــــــــــــــــــــــــــــــــــــــــــــــــــــــــــــــ من صافي الماي حد ايعم : وحد ملوادم تبا شيره أنظر على الزرع ماصافي : وجو اللي مصطاب ماصافي ناسن يقولو مصيره ايعم : وناسن يقولو تباشيره وستنواصل لا حقا للحديث بقية |
استاذي
البعض من مرتادي المنتدي يتسا~ل عن همبل الخيل ؟؟ هل لها تغرود خاص او همل او نايحه ايضاحك سيدي....................... |
استاذ
خميس هل لك ان تعطيني بعض الأمثله لهمبل الخيل ؟؟ |
الراقي
جدا خميس المويتي بختصار هل الويليه من الحديثه ؟ ولماذا ومن اين اتت؟ ولك ان تظرب لنا مثالا بفن الويليه ؟ |
| الساعة الآن 02:53 AM. |
Powered by vBulletin® Copyright ©2000 - 2024, Jelsoft Enterprises Ltd. TranZ By Almuhajir