|
هب العطا والقاصي القاصي ما حاجني من سافلك سافل غير الرجل ما يعتق العاصي والحر عن كيد الوسن غافل لو شاعلي صاحب ناصي روضت لاجله عاصب وجافل واضرب بصدري شيمة تاصي عين الكرم.. وتشوفني واصل حنا وصينا الجود للواصي وصار الثرا بجدادنا حافل لا تحتفل للحاجر القاصي واحنا رعود القوم والفاصل |
في ركننا الهادي تعب فالت من المحتاج ياخذني من بلادي وانا المسكون حب وطيش من المحتاج فيني يعيش وأنا المدفون فـ بلادي |
يسعد صباحك ابد ما قلت لك عذري تدري بـ سيف الزمن ما يرحم امثالي هزيت جذع السنين وقلت يا عمري محتاج عين تشوف لـ مزحة احوالي خايف على غرفتي ما تتسع صدري خايف على جدرانها من كثرة سعالي اكبر على وحدتي واصغر على صبري وما خلف بابي سوى تكشيرة نعالي الا حبيبه! وخانت كل شي بدري يا رب مالي سواك ورفقة ظلالي |
اقفلت قلبي لا وعود وحبايب وارخصت ذكرى زاحمت بالضغينه مالي سوى غرفه تجيب النوايب حسيتها صارت بحجم المدينه وامشي بها والشمع ذايب وذايب وابكي على كل الزوايا الحزينه مرمي بها حد التعب والمصايب يارب لي غرفه لعينه لعينه |
خارج الوعي!! اتصدقي خارج الوعي انسان ما همه سوى كيف ينسى اطلق بلاده في ضلوعه بلا سعي يقسا ويقسا ويقسا ويقسى |
تحتنا غيمه تحتضر وتنتظر من يوسدها تحتنا غيمه كانت تنفجر لما يحاصرنا الجفاف كانت ما تخاف من شي سوى لا نغرق وكنت انا اسرق الضحكه من الاطفال عشان عشان عشان احس اني انسان وتشوفني الغيمه وتفرح بس الغيمه تحتضر وتنتظر والجفاف بدا يصحا من جديد و فـ حارتنا شخص واحد سعيد شخص واحد انااااااااااا عشان الغيمه ماتت وصحى كل الجفاف وصرت عادي ما اخاف |
خوف وقلق من اديم الارض الله يارب الفلق يا منجي القلوب يا باسط التوبه لنحر الذنوب قلق وخوف وارصفه متزاحمه بالناس وياس وظروف وحزن فوق الوصوف يقول لي صاحب قديم شوف الحياة قلت ياليت اشوف خايف وقلق بس احس بشي غير عادي احس اني خايف على بلادي ومغروس ف بلادي ومتروك ف بلادي احس اني حي واني متكون من جديد احس اني حزين واحس اني سعيد واحس بسنين ميلادي هذا الخوف وهذا القلق ما هو أكبر من رب الفلق وخوووف |
وحيدك يهز خوفه عليك طاحت اوراق عمره بيديك وانكسر وحيدك سهر ما جف حبره ولا خاف عمره يمر انتي وين اتعبتني السنين وصرت خايف |
عمان عمان عمان قابوس قابوس قابوس مال الكرامه سوى سلطان مال المعزه سوى ناموس اترك بها قيمة الانسان واغرس بها حبي المغروس ياسيدي يا باني الاوطان يا موطني مالك سوى قابوس |
تغيب!! واشق صدري لريح الشمال من فوقي الشمس شال وما بين لهيب تغيب!! وأنت تسكن ضلوعي واحن لك احزن عليك اشتم قساوة يديك ما احن لك ما احزن عليك مشتاق قسوة يديك وتغيب |
واقف ورا الباب اعزي الوقت انتشل نفسي من الخوف ورا الباب واقف ما اشوف |
الليلة مشغول ما عندي وقت اسهر عندي موعد مع الليل عندي حزن عايش وعندي فرح مقتول |
اتنفسي شقي من الصدر لون العلم ياللي ترابك عبير.. وعزك عروق النسم اتنفسي بشوف بك نفسي واغيض العدم محروز فيك الجميل يا شمسنا والاصيل يا عرق ما صلب بالارض غير العزم اتنفسي ودي اخيط بشرايني شقوقك وكوني بخير واكون باكر واكون بك امسي شقي من الصدر لون العلم واتنفسي |
لقلب هيثم العيسائي يا محاصر فراش الحنين ما يشبهك غيرك تمر السنين وانت واقف على الجرح وجرحك حزين ما يشبهك غيرك توسد على جرحك الاول في داخلك نبض يتوسل فراق وانين |
يشيخ وجهك وانت وجهك حجر يفداك قلب ما يوم يفتن عليك وتمر ساعة يديك موحش الوقت دونك اخاف افقد عيونك وتمر ساعة يديك ونظل ما لنا ظل نرتب الحزن نرتل الخوف نرتد مثل ما كنا ويديك مرت وتوقفت للموت ساعتنا |
صب الوجع!! مأجور صب المواجع في ليلة مرت تسوق المآسي صب الوجع!! صوت المحازين راجع تفداك روحي يا حزين المراسي صب الوجع!! ما به من الناس فاجع غيري..ويحسدني على............ ناسي |
اليها في ليلتي الباردة عندما صدقت حكايتها عن ان الرجل ما هو الا بوابة مفتوحة لكل العابرين هي لا تعلم ما معنى ذلك ولكن تعلم جيداً بانني لست كما صدقت وتعلم جيداً هذه الملتويه كأفاعي الملوايا بانني لا أجيد التملق والاندفاع الى مغريات النساء وعزلتهن عن حياة المناصرين للحياة الهادئة والمطمئنة. الى الجحيم ايتها المبتذله والفارغة كزجاجة خمر انتهى من شربها ابناء الشيطان في ليلة حمراء اليها . . قبلي طينك تعبتي من شراك النفس عن ملجا وعن بينك انا ما لي جسد يتمسك بجرمك ولا زينك هبطي للدرك يا سافلة وانتي بلا كنتي تضمين العذر في ليلة حمرا لعن فيك الحيا يا جملة القشرا ولعن فيك السنين وسيرتك غبرا تعلمنا نعين العابسه العذرا ونذري في الشدايد باسنا ووجوهنا غبرا |
انفتاح ارضي ارضي لا تغيب الشمس عن بيت الفقير انتي لو صرتي حصير تمنعي الجالس كلام يا حرام يا بلادي كل هذا صار في لحظة نيام اطعني كل الجلوس اطعني احمد محمد علي سالم اطعني الظالم الا وحده اتركي اللي لابسه الاسود هذي هي اخت العروس ديمقرانية الشوارع خالية والمساجد خالية وبعض سكان المدينة في الملاهي وبعضهم بيديه شاهي وبعضهم بيديه ورقه بس ما عنده قلم والقلم عند الاسد والاسد فوقه قفص والقفص هذا بلد والبلد فيها حسد والحسد يلعن ابوه |
تكتبيني كل ما حالفت حظي واشتهي اكتبك احمل من غروري اكسر الحاجز/مروري استدير لوحشة الغرفه امزق في حضوري انتزع صوت المولع انتشل حزني المدلع اشعل الموت بزهوري تحت شرفتنا كلام لا لساني يقدر يشيله ونمضي ولا طيوري وين اضمك يا حبيبه ضاق بي فسح المكان وضاق طيبه منطفي كلي وبعضي وبعض بعضي وبعض من كانوا بقربي شوك دربي قوتي ايمان ضعفي وين اضمك يا حبيبه خبريني لا ورب البيت الا سامحيني |
شعبك عظيم يا بلاد الكرامة يا بلاد الكريم يا درة الارض مهما حصل يا شعب وافي وقايد بطل شعبك عظيم مهما حصل |
يا عاهلي والبلاد رفرف عمود العلم وطاحت رؤوس الفساد ما كان بك من قدم ما كان بك من معزه ما كان بك من عتاد طاحت رؤوس الغنم ;) |
جدرانك بدون دم وعايش وحيد تملئ مكان الخوف حلم ما بك جديدٍ غير نفسك وحزنك وشبابيك عزمك المنفي ما بقى غيرك يصحّي أثاثه لا صرت أنت والغربه ثلاثه وجدرانك بدون دم وعايش شريد تقرا عيونك كل ليله خصومك وتكتب همومك على الجدران يا محقر الجدران وْوحيد ماتت أمانيه وأجمل أغانيه يصرخ بوجه الحزن كافي ويرد صوته منافي ويصير كل الليل سجن وبرد وريح إلا صوته كان دافي ومرايا من حديد ما تعكس النور وما به جديدٍ غير سور يشبه فراغ المدينة من حنين وأنا الحالم المسكين الباقي لذاتي اللي ملتني كثير كثر السنين اللي ضيعت إنسان وكثر صاحبي الحرمان بس مالها الجدران بدون دم ! وشبابيك وألوان ومتشبعه بالحزن وريح وبرد وطول الليل سجن. |
تحت امرك قلت لك تحت امرك هذا أنت وانا لله دري وانت لله درك |
الله يا وادي الشمال معجون فيك بصدق وصخورك ذهب ابيض واشجارك ظلال في ممراتك ما ينام العشب وفي ضفافك تنطق الازهار وفي سماك اللال الله يا وادي الشمال ما غيبوك الناس ولا عاتبوك اللي نسوا ارواحهم بجسادهم مزن واطلال يا سيدي الوادي انا راجع لسدرة عمرنا المهجورة وراجع اشوف الصورة اللي تجمعني مع اولاد الطفوله وكل اللي راجع اقوله اني معجون فيك بصدق وصخورك ذهب ابيض الله يا وادي الشمال |
ف ي الساعة عقارب تموت بس ما تموت الساعة وفي الحاره بيوت متشققه وهلكانه وبشر ملتاعه وعقارب الساعة تموت تمطر الارض شوك وتنبت سمانا مطر مبروك عاشت الساعة دقايق وعاشت بعدها ناس من يقدر يجيب الشوك ويرش المطر؟!!!!!! عشان الساعة تعيش وعشان بعض البشر :eek: |
اتهام باطل وعزة نفس متناثرة وقضية خاسرة ومداخل كثير وفـ المقابل انسان حلمه كبير سقط عمره ف التراب وما درى عن اي باب يوصله للاخرة قضى وقته يتبع سرابه ويمزج الوان الحياة ويكره العابه قضى وقته مع احزانه وحيانه وما قدر يهزم فراغه صار صلب واقف حزين صار فزاعه وعنده كلام صار قدام قدام قدام بس بدون فوز وصار يكره اغاني الفراغ وما كره فيروز هذا انسان جداً طبيعي لدرجة انه محجوز في دائرة وفي جيوبه زوايا ومعه علبة سجاير وولاعه ومعه عكس اقتناعه بالحياه وضماه جداً طبيعي في الساعه وحدة من كل يوم ينتبه تحت النجوم وما معه ولاعته وسجارته والدائرة مغلقة |
باكر تهون لا ترتمي تحت ظلك باكر ترد العيون وتشوف خلك يا طول باكر . . . تحت السقف شخص واهن وأكبر من همومه ولكن محتاج ساعة يد ومحتاجها عن جد رمى بكل الاثاث واحتاج ساعة هذا الوحيد مسكين كان مزحوم حب هذا الوحيد اللي تحت السقف كان له قلب صادق وباعه كان له شمع واغاني واحلام ومرت الايام ومرت الاحلام وذاب الشمع والاغاني ذبلت وبقى وحده تحت السقف مشتاق للساعة |
يا زهرة الحي انا حي ما غشاني الحكي ولا البكي انا على الاقل كنت وافي وصادق وكنت واثق من اني احبك انا بجنبك . . . تحت السرير متاع وحده عابسة مثل حظي او ميته مثل حظي . . . اطرق الباب ويخرج حزن عاري ويسألني عن اخباري واقول بخير اغلق الباب القاني حزين واطيح من طولي . . . انام في صدره او على قبره محتار |
مرت مثل كل ليلة تمر تفرش الخزن وتغني وتأخذ عباءة اوجاعها وتسكت مريم اذا غنت حارتنا تسكت وشوارعنا تسكت وعجايزنا تسكت والريح تسكت مريم لو تغني بطول ليلتها وبطول ما كانت تلوج فتات خبزتها اظن قلوبنا تسكت هذي مريم اللي كانت تنام بذراع خاينها وتدري انه يخون هذي من كثر ما كانت توفي وكثر ما كانت تحب وكثر ما كانت تشوف عــــــــاشت بدون عيون هذي مريم اللي قالت لازم الليلة اخون وخااااانت ومرت مثل كل ليلة تمر تأخذ الحزن وتغني وتفرش عباءة اوجاعها وتنام مريم اذا خانت تترس الحارة كلام وشوارعنا كلام وعجايزنا كلام والريح من كثر الكلام نامت ومريم تخون مريم تخون |
اطويني يا بنت الحلال يا رفيعة نفس اطويني مع السهد والضيم اطويني من الغيم اضم ايدي بصدرك وافارق عذول الناس لو بابك وسورك الحراس اجيك واحط ايدي على صدرك واغني انتي من وين؟ انتي مني اطويني اطويني قبل الظلال وقبل الفجر يصحى اطويني يا بنت الحلال |
كم تباهى بحزنك وكم تباهى ما رد عشرين عامه من جفافه صار اطيب من ضفاف الماي واطيب من ضفافه وكم تباهى بعشرينه واليوم يبكي زجاج |
ينبت هنا توتك وياقوتك من يشبع احلامك من الياقوت من علمك ان الحزن موتك دام الحزن اوحش من التابوت لو يسعفك من غربتك صوتك اقسى من انك عايش بلا صوت لو كان للشارع سهر قوتك وش لك تمر لشارعك بسكوت كان الضياع ويندهك فوتك ما بين ليل وصمتك المكبوت راجع ولكن اجمل بيوتك قامت تشد الراحله للموت اكبر من احلامك وياقوتك انك تعيش وبيتك التابوت |
كيفها..؟ يا زمان الذكريات الجميل من تمنت على المخنوق كثر السعال وينها..؟ بس هذا الحزن ما هو ثقيل لكن الوحده وطاريها تشل الرجال |
في كل ركن بالعمر..! محتاج اكون انسان ابسط من معالي همومه محتاج درب وقلب ويدين وعيون وتراب ارض ما شكى من غيومه محتاج انثى.. تهتك بعرض الظنون وتكون لي بيت الرضا والخصومه محتاج نفسي قبل كل اللي يكون انسان عاري..راس ماله هدومه |
علياء للبحر حارس وللنوارس قلب ما يحتمل فرقا وانا جالس أعد الرمل وفي بحرنا غرقا ينادونا وطاح الغيم يابس وأنتِ وأنا حراس ومن فوقنا حارس ، ، الى حارسة الثلاثة البحر والنوارس وأنا / ، تعالي نعلق نجوم السما ف قلوبنا ونخاصم الارض تعالي هنا تحت السما نبض مستوحش وجافل ومالي سوى قلبك لو قلبك الغافل تتشقق السما وتموت النجوم وابقى وحدي من الصبر محروم وانتي مات قلبك ، ، ، من غارق الهمس الى أمس وأمس واجد حزين أتلمس الصخر وحدي وما عندي سوى نفسي وليل وحكايات وزهر يابس وظما غرسي وأنا جالس مع الصخر أتلمس الوحده واشتم قبل أمسي. ، ، ، أمتد مثل السراب ظامي وتحرقني الشمس واشرب من ثيابي العرق ما أكثر عظامي على صدري وما اكثر الارق ظامي كثر ما فـ قريتنا نخيل عطشا وقالت تميل على حوض السراب وقامت تميل قامت تميل تميل الله يا العطش كسر ظهر النخيل وأنكسر ظهري ، ، ، لوين ارجع؟ والدروب الشوك والقدم حافي على وصلك لوين ارجع؟ وانا قبلك تعثرت اطيح من طولي عتب وما اقول انتي السبب انا واحد ظل يشتم فراقه ويجمع قد ما يقدر اذا تبعثر لو قلت راجع ابجمع الشوك من دربي وأهديك باقة ، ، ، أحبك ما قلتها يوم الا للبحر والنوارس والنجوم أحبك وقت ما ترقد الاهداب ويوم اقوم افتح الباب واتخيل انك وصلتي وانتي ما زلتي بعيد تذبحين الوصل ويصير حبي نصل مركوز في صدري شفتي كيف بدري تطعنين واني مذبوح السنين وأنتي!! انتي.. أنتي لازم تجين بدري عشان أحبك وتنزعين النصل من صدري |
اتسلق النوم وابطي واعيد الفرار وما بيني وبين الجدار انسان ما يعرف الفرق ما بين الحزن والنهار وابقى اتسلق النوم وحدي ومخدتي تنهار ما بيني وبين الجدار انثى تعرف الفرق ما بيني وبين النهار |
يا تايهٍ في وجه مرسوم العتيم لله باسك..كيف وجهك ما يدوم مجبر عليك انسام واحلام وسديم لو حاجتي عميا وبيديك النجوم يا تاركٍ جرحي على حقد الغشيم تجرحني افعال الذي ما له سلوم ياما تمنيت الرضا بيد الخصيم واحتج من قلب غدا ظلم وسموم من كان يتركني على باب الهشيم ما مرني من غير ما يبري الحلوم افرغ وانا المحتاج من شح النسيم غرفه تكلمني ولو اني كتوم القى بها نفسي وموعدنا القديم فيها اصادف عطر ميت بالهدوم يكفي |
خذي الوقت وأتبسمي أنا الدقايق معي هم وأنتي معي لا تأخذي عمر الثواني ولا ترتمي في العتيم اباخذك من يدك واغيض الغشيم اللي سلبني الفرح أنتي لو عرفتي ايش يعني الجرح كان جيتي بكا على وجهي ورميتي الغياب ما سألتك كيف كان العتاب وكيف يجرحني الوداع وكيف خليتي عيوني تلتصق بالباب وكيف وكيف وكيف....الخ أنا الدقايق معي سيف وأنتي وقتي القادم |
يجف الجفاف وتسرق الارض غيم الخصب وما بقت للعيون الهدب من وين طاح الظما؟ من وين؟ و أنا عاثر مع الوقت ومع الناس عين وعمى ومن كل ما عطيت ومن كل حاقد رمى وأحتجتها باكر تكون النفس وشاخ باكر وبعد باكر وما لقتني الحظوظ وزاد قحط السما كيف تسرق الارض غيم الناس؟ وكيف ما عطتني الناس شربي!؟ وكيف السما امطرتني الجفاف الله يالظما..ما تخاف؟ |
على الهامش مودوع جيفة جسد ما لحقها النهار وعلى الجدار صورة ولد يشبه الغيم ويتنفس الازهار وطاحت الصوره من على المسمار والتقتها الارض وطاحت مع الصوره كرامه وعرض وما حدث الناس شي وبقى الجدار وبقى الفي والصوره ماتت وماتت الازهار |
| الساعة الآن 07:39 PM. |
Powered by vBulletin® Copyright ©2000 - 2024, Jelsoft Enterprises Ltd. TranZ By Almuhajir