الغيم و الحرمان

* القصيدة الفائزة بالجائزة التشجيعية

انا اللي عصرت الغيم سايلت لك وديان
لجل يرتوي جدبك نشف كل ما فيني
كذا كانت القصة مع الغيم والحرمان
كذا كانت الهقوه تهاوت على ايديني
اجي منتشي بالريح وانصب لك هتان
عسى ينزرع بك حس في يوم تحييني
تناثرت لك بالفي بقايا حطام انسان
الامس ثراك اليوم يمكن يداويني
على الله بقايا الشوق متبخّرت نسيان
على حرّ شمسك والامل ميّت بعيني
ترى مشكلة غيمي على ثورة الوجدان
ثقل محتوى صدره حمل لوعة سنيني
برق خافقي من شبة النار و الكتمان
و رعد الوجع صوته و قف بينك و بيني
شرب قاعك الخاوي سقوطي وانا ضميان
وانا اللي هديت لباكرك وردي و تيني
عتيم الحزن ما زاح لو جيت له عتبان
عباته على صبح الصبر عيّت تعيني
تخيل زحام الغيم من قفلة البيبان
قفولك صدود البارحه يوم تنهيني
انا هالفضاء يا هيه ما كان لي صنوان
تصور مكانك قبل ترمي و تخطيني
تصدق نفضت القلب ما عاد به ما كان
خذتني هبوب الريح لا تنشدي ويني

علي الغنبوصي

سراب

جفت عيون العشق تتبع سرابك
وانت البعيد وما بقى فيني شعور
كم قلت لك والليل واقف ع بابك
قلبي عيون وطلتك منبع النور
ياللي أحبك لين يرضى عذابك
قلبك غصن واحساسي بحبك طيور
من يوم ما حظي تعنى وجابك
بيني وبينك أشعر جبال وبحور
وأشعر بأني كنت صفحة بكتابك
وأشعر بأن الكون من حولك يدور
أربع سنين وما بها شي تابك
كل الأماكن ترجع وتلعب الدور
أربع سنين ولو رحمني غيابك
ما كنت أبنزف لك من أشعاري سطور
أربع سنين وعطرك اللي وشى بك
وعاش اللقا ما بيننا بدم مهدور
أربع سنين وما لقيت بترابك
بذرة أمل ، وش تزرع بأرضك البور ؟
عشت لعيونك والطريق ابتدا بك
وأهديت لك قلبي ولاني بمجبور
بس ف غيابك مات قلب حيا بك
من صدتك عاش العمر وسط ديجور
ارجع عيون العمر تتبع سرابك
قلبك بعيد وما بقى فيني شعور

يوسف البلوشي

صبح الوداع

ما زادني صبح الوداع إلا شتاته
في عينه الدمعات تخنقني وبكيت .
لا ﺫلني صمته ولا هيبة ثباته
اقفى على ريق السهر ،يومي قفيت
خلوه يصحى ، قدّ ما مات فـ سباته
وان هو غفى بكيفه ترى عنه عفيت
خلوه يتركني قبل ما أكره صفاته
ياما بكت فيني الليالي ولا شكيت
مثل النخيل اللي تحرمه من نباته
مهما قسى يعطي و يحزن ان سليت
عودت حلمي لا انتهى ادفع زكاته
يا ليت القى لي حلم كل ما صحيت .
اشبع وماجاني العمر إلا بـ فتاته
انسى واثاري الناس تـﺫكر ما نسيت
يا ربْ لـَ تطوي ﺫكرياتي من حياته
حتى ونا ما ابغاه لي عمرٍ وفيت
باكربـ تفضحني القصايد في وفاته
لاصحت قدام الوصايا وانحنيت
لاني بنت عمه ولاني من خواته
ياهو صعب اسكت ع كثر اللي حكيت
قولو لـ أمي ،لاحرمتني من فراته
اني شربت النيل لكني ظميت
هو كان يعشقني كثر عشقه لـ بناته
حتى ولو ما قال فيني ربع بيت
والله تعبت اخفي عن اخواني غلاته
ياليت مت وما نفع لجلي فديت
خلوني اسكت ،لين تسمعني جهاته
بعض الصدى يهدم وانا ما قد بنيت

أصيله المعمري

مدى

بيني وبين الزحام
باب منقوش بالورد
ومفاتيحه كلام
وقفله كفوف ونرد
عاثر..
لو حظنا العاثر سلام
تطيح الفواصل
وتنبت الارض الغمام
يكفيني من الزحمه ورده
اذا العمر ذابل
واذا قلوبنا عشق وابل
في وجه المدى
وما تبقى من صوت الصدى
وباقي العمر تحصيل حاصل
ما مدتني السنين
ولا مداني المدى
ويبقى مع الصوت زخ الندى
وتبقى الفواصل
ما بيننا وبين الكلام
ولكن..


حصدت ما جاد العطا وأنت ثايب
يجهر بنا ما جاد فوق الثوايب
يقحل فلاك وعين غيزك تودي
سوق المطر لانسام طلق النوايب
شديت رجلي صوب نبض الرواجع
وارتد جسمي وانت يالشوق عايب
اظما وتشربني فلاج الضواحي
ازعل ويرضيني جفاف الحبايب
مديت شوفي للسما في غروبي
ما ضاق وجهي غير قحط السحايب
واسرفت في شوفي وازهقت نفسي
جمرت شوقي يالضما وانت خايب
منعم ولو مالي سواي وظنوني
مشرق ولو اني مع الضيم ذايب
محتاجها ترمي التعب من عيوني
وتردني بين الخصب والروايب
اشعلتها فدوة عيون الحيارى
عن ليل ما يخطي وعن صبح صايب
وابقى على متن السهر او رقادي
طفل لبس في داخله روح شايب
يضمر ويضمر نيته في مداها
ويفك من صدره شلول الركايب
منعم ويا ليت السحايب تودي
صوت المطر لانسام طلق النوايب

مختار السلامي

أخي أحمد،،طلبت مني قصيدتي المشارك بها في الملتقى ولكن تعذرت لك لإن ما عندي (سوفت كوبي)


ثورة عماني



بذكر الله أبدا في قصيدي

وذكر الطاهر محمد نبينا..

أنا في خاطري شي حفظته

وربي نعم من يقدر يعينا..

ألا يا سامعي ثمن كلامي

كتمت القول من ذيك السنينا..

لنا صيت(ن) تعالى بالمسامع

على الساحات نروي ما ضمينا..

لنا مجد(ن) يشاع بكل منبر

على طيب الفعايل قد رسينا..

عمان الخير يا أرض المكارم

يا ماضي زان بقلاع وحصينا..

ألا شهم(ن) تعالى عز شانه

بسط يد اليمين وإرتوينا..

يا أمي يا عمان العز آسف

ومتأسف على فعل(ن) يشينا..

أنا مخجل وفي حقك مقصر

على كثر القصايد ما وفينا..

يا شعب عمان هموا وإستفيقوا

ترا النيات بانت لو غفينا..

تراني كاظم(ن) غيضي وكاتم

على الي أضحك الشمات فينا..

يا مر الفعل لو جارك يخونك

نوى يهدم ويجني ما جنينا..

يا مر الفعل لو شعبك يهزك

نوى يحرق ويهدم ما بنينا..

مقاصد سيئه ونفوس أوطى

حسيب الله نكران اليمينا..

شباب عمان يا قابوس زندك

حماتك دوم تاج الأكرمينا..

طردنا البرتغال وأهل فارس

على البحرين أرسيت السفينا..

طغينا ع الفساد و ع الأكابر

حفظنا الدم و رفعنا الجبينا..

خمدت النار في ساحة بلادك

غرست الأمن وأثمر ياسمينا..

وحان اليوم ترجع صوت مجدك

وتعمي عين من عينه علينا..

نحن شعبك وهذي هي بلادك

على ما قلت شعبك طائعينا..

ونوفي بالوعود إذا وعدنا

على نهجك سنقسم باليمينا..

نعم إنها بهايم من تحاول

تفرقنا وتثري الحقد فينا..

حكمنا عمان بالسيف المهند

على روس السلاطين إعتلينا..

جنود تسيدت شبه الجزيره

حصان العزم والصبر إمتطينا..

نجوب الأرض والخطوه كبيره

على أنف الحسود نحن وطينا..

(إذا بلغ الفطام لنا رضيع

تخر له الجبابر ساجدينا..

لنا الدنيا ومن أضحى عليها

ونبطش حين نبطش قادرينا..)

تعودنا على شرب المراره

وإن الله حفيظ الصابرينا..

ولو جارت بنا الدنيا وشانت

تلاحمنا..على النخوه بقينا..

نعم قابوس لي حق أفتخر به

أبي قابوس قائدنا الأمينا..

فداك الروح وبدمي أمدك

على مرضاك نبصم باليدينا..

أيا مولاي يا شهم المعاني

نحن زندك جبال(ن) صامدينا..

نقاسي هالزمان بطبع لين

جلاميد(ن) صبرها ما يلينا..

وما فينا ضعاف نفوس لكن

ترافقنا فعول الواشيينا..

يا شعب عمان حذرك لا تنادي

بغير الله حاشا ما ابتغينا..

ثنى فينا رسول الله أحمد

خذينا من صفاة التابعينا..

(ونشرب إن وردنا الماء صفوا

ويشرب غيرنا كدرا وطينا..)

نعم خضنا وعايشنا وسرنا

نحن نعطي ولا يوم(ن) خذينا..

مدام الخير من فضل الجلاله

تدوم عمان تاج الأجمعينا..

يعم العز في أرض الحضاره

يخيب اليوم جرم الفاعلينا..

ترا هذي عمان وذي أهلها

وإن بخلوا يظلوا أكرمينا..

وأنا من ساق رجله للمعالي

كفخ زنده صعاب(ن) ما تلينا..

أروض هالقصايد لجل أرضي

غرور(ن) ثار في صدري دفينا..

على كتف الزمان نثرت شعري

وصار الحرف أهلي والبنينا..

فما أحلى مضاجعة القصايد

لنبقى في ثراها خالدينا..

ألا يالله أنا أسألك فضلك

ألا يا صاحب العرش المتينا..

عساك تدوم قابوس المفدى

ويبقى عهده المشرق مكينا..

ختام القول وختام القصيده

بغير الخير أبد لا تبتلينا..

صلاة الله سلامه في ختامي

على المشهور خير المرسلينا..



المهند النبهاني