ِذاكره طفل
وش يقول... اللي يحب
للتراتيل اللي غنت ذاكرة كل الرياح
واخذت حديث الصباح
للبلاد اللي تندى وجهها
أطفال وامطار وعشب
وش يقول اللي يحب
ذنبي يا أول ذنوبي وآخر ذنوبي صرخ
أيقظ الدنيا صداه
أورق بضلعي سناه
صولجان العشق في صدري كبر
والغرور اللي سكن وجهي كفر
غازل أهداب الغيوم
وامتهن لثم النجوم
ارتمى نخيل وكواكب
وانتفض شعر وشهب
وش يقول اللي يحب
جاك يا بلادي ولد
جاك عزف ونزف
وبروق ورعد
يا حبيبي حبي اللي شلته لك.. فاض وتعد
والحنين اللي ذرف أنفاسه لك.. دفء وبرد
جاك همس وبوح
جاك ريح وروح
طفل... قلبه بيده لا تعثر.. وثب
يا بلادي كلما طافت صحار بأربعه
البريمي الوادعه
من غيره ... تهفو مسرعه
وكلما مرت بي صور
أو صدى اليامال صحى الأشرعه
طيف نزوى صاح بي استرجعه
وكلما قبلت خلوة عيون مسقط
لفت إيدي حول مرمر خصرها فجأة صلاله
واسكرتني للثماله
صدقيني.... كلما همهم على شتاتي تعب
أغفو باحضان الشغب
وش يقول اللي يحب
يا بلادي هودج الذكرى طفولة
وقافلة هالحب ملآ
بالحرير وبالمواويل النفيسة
اذكر إني شلت لك بشفاهي قبلة
وفي فمي خبيت كلمة
كنت أداريها حبيسه
كنت أجوع... لسكر شواطي لماك
كنت أضما بس... للماي بشفاك
كنت أخبئ لك عصافير وحمام
كنت أدحرج لك غمام
كان يفضحني غروري
كبريائي فاض، واستشرى
شعوري
كنت اسولف عنك لأسراب النوارس
كنت أشاكس... كنت أمارس
أحلا طقس، وأحلا همس
وأحلا ِدرس
وش يقول اللي يحب
