آخــر سنة
بالليل جندلنا رقاب الصمت واحراش الحضور
والغم طار بلا عيون وعاد لأعشاش الشجن
وحسيت أنه يا صديقي حان موعد هالغرور
والله ما يسوى الجدار اللي سكن فيه العفن
هزيت لك
ياصاحبي في الغيم أعذاق البلح
وتناثر البلور وانته في السحاب هناك
حطمتلك أول عريش بهالمدينة يلتعن
ومشيت من فرط الحزن
صليت من فرط الوجع
وأفجعت فيني هالدموع
واتسول أخبار الذهول
وأتيمم الفجر الحزين/ المعمعة
ريح - ن – تشل اكياسها
آخر سنة
مع هالأفول
وتلملم الشمس العجوز الأمتعة
وتمرجح ظلال السمر آخر عبور
آخر محطات المهانة والدجل
من يعلن التأبين لك يا صاحبي؟
والله ما أزور التراب اللي ارتفع وسط القبور
لا زلت تعزف ع البيانو للشموخ وللوطن
جدلتلي شعري وزرعنا نخلنا بين السطور
حدثنا أسراب الصفارد عن جنون بلاثمن
علمتني أسكت وأمزق
كل أوراق السفر
واتنفس الكلمة على وجه المداين والقمر
وأستنشق الدخان في جرح المطر
ما طبل المذياع لك ياصاحبي
مثل الطبول اللي صرخت لأجل الغريب
صدقت انه ذا الشجر
ما يطعم افواه اللي اسكنوا منه قريب؟
أستودعك يا سالفة شارع طويل
يا كبرياء الأرض وشموع النخيل
ياللي غرق لوحك كثير بهالنهر
ياللي عزفت الناي بأسنان الطهر
من يعلن التأبين لك؟
بدري انكسر هالوقت في وقت الصلاه والنور
والروح من كثر التعب هودج يزازيبه الكفن
بدري يلم الجوع أطفـالك بدون شــعور
بدري تلمك هالقفر ياصاحب الدرب الوهن
علمتني أن الوزغ
لو طاف من حضن القماط
وتناثروا هالسابله جنب السماط
تتوحش أطفال البدن
والأرض تبحر في سفينة أقنعة
والله ما أقتات من ضلع القهر
والله ما أسترخص ايام السهر
بالليل جندلنا رقاب الصمت واحراش الحضور
والغم طار بلا عيون وعاد لأعشاش الشجن
عبدالله البطاشي
