محاورة في جزيرة مصيرة ليلتين ما وقفت

[محمد الراسبي]

دار طرب ،،،، دار فن ،، مكان بارد ،، ناس طيبين ،، واهل كرم .......... كل شي يجتمع في جزيرة مصيرة

المساجلة كانت قبل اسبوعين بالظبط بتاريخ 15-7 2010

وعاد هناك عرس مميز ،،،، كعادة اهل مصيرة والطبول اللي معزومة طبل الوافي من ولاية الكامل والوافي وطبل ولاية مصيرة

ندخل للتفاصيل :
- بدأت الرزحة يوم الاربعاء العصر
- وكملوها بالاربعاء بعد صلاة العشاء
- وعاد بالخميس الصباح ايضا كملو الرزحة
- وعصرو بالخميس
- وارمسو فالليل رزحة مرة ثانية .


وطبعا الطرب والفن والحياب والرزحة على كيفك (وفي الشامخية غير )

- - - - - واليكم تعصيرة الاربعاء :


والمحاورة بين سليمان بن خميس البلوشي ( ود خمسات ) وعلي سعيد الراسبي ( ود زعل ):

قال سليمان :

صلوا على نبياً معتكف ف الغار = وابن أريقط بالغنم يمحي الأثر
سلام الله عليكم يا سكون الدار = سلام نكتبه مره ونردّه عشر

قال علي زعل:
وذات النطاقين تجيبلم أخبار = وبقوتها ياللي عليهم مستمر
ياسعود جرب عندهم محفل الأخيار = يامروي اليتامى وكافل بن عمر

سليمان:
سعود وربعه ياللي يثمنوا الاقدار = وعلى الطوايل عنهم مابا أنقصر
تبارك الله السدره عامره بثمار = ياود زعل تشور نسناس الظهر

علي:
الميعلي نبراسنا ونور المنار = في صفنا يومآ وصلنا م اعتذر
يابيلسان السدره وضليل الشوار = سلي على سعيدي ل ايصيبه كدر

سليمان:

بخلفلك مثل كرياسي = يالمهوي ويالرماسي = الليله عجيد الدوله = إمضيف هارون الرشيد
آحيدك تعرفلي جياسي = وتفلّت قفول الراسي = هيش رايك بناخذ يوله؟ = من نقبض زمام الحيد

علي:
بقرأ الفاتحه والناسي = وبارمس خيار الناسي = شايل في راسي حموله = وأعبر الموج العنيد
لاباس الحشم لاباسي = وبنرمس نعيم اللاسي = م الظهر تدقل سيوله = يومآ خبرنا حديد

سليمان:
قولك واكد مااغتلاسي = ولا حبرآ على قرطاسي = ضاري ع الثقل وشلوله = ايعرفك اشحاري وديد
فاقد في لقاء الحراسي = شيخ اقبيلة الرواسي = م البارحه أرقب اوصوله = وأخربي ساعي البريد



...............................................................................

اليكم الرزحة بالاربعاء بالليل :

ايضا تمت المحاورة بين سليمان بن خميس البلوشي ( ود خمسات ) وعلي سعيد الراسبي ( ود زعل ) :
وايضا صالح بن سالم البلوشي ( ود بيروه ) من محوت :

علي:
ياليل هيدلي وماشيني بمهل = يلين ماوفي ربيعي العاذره
يلين يتبرهن قلبي ويطيب الحفل = بوجودكم أهل الصفوف العامره

سليمان:
ياالله ياهاالليله ويامحسن هالزجل = ويسدني كوس الهبوب الفاغره
قولوا اللعجيد السيره لا يرص القفل = وآنا قفل راسي بحطمه وبكسره

بيروه:
صلوا على خير الانامي = لي يشفع يوم الزحامي = لي الأمه عليه اتحنله = في شدة يوم القيام
لمن حضر بنثر سلامي = بتحيه وزود إحترامي = الحكماني أنا بوصله = لو يسكن برور الشام

سليمان:
صوغك عجبني والنظامي = ياصايغ بني هشامي = وزمني الضمير آشله = مثل برقآ ف الغمام
يستاهلوا أهل المقامي = أرجوا اوصولهم م العامي = لكن نبراس المحله = خلاني على الأوهام

بيروه:
الليله بنشل الاعلامي = في ديرة ناسآ كرامي = زهيتوا الطرب ف الحله = وأنتوا من ناسآ كرام
صف الراسبي لي دامي = في كل الدهر واعوامي = وأشهد زجلهم مانمله = وحيا من صاغ الكلام

سليمان :
جينا لصقورآ حشامي = يأللي راووين الضامي = طابت من ضميري العله = وأول مبتلي بسقام
هبي ياكوس الولامي = بالقرنفل والخزامي = أسميك ياليله مكله = وآيد زدتيني غرام

بيروه :
حيا بشبانن ولامي = يااللي يطيبوا المدام = مقصودك أنا أندله = من هين بايت الحمام
جبلأ عالي بالرخامي = م قدر دقدقلي عضامي = عن نفسآ تروغ بزله = أبغى يالشاعر ختام



...............................................................................................................

يوم الخميس من الصباح دارت المساجلة ايضا بين علي زعل وسليمان ود خمسات :

قال علي:
صلوا على نبيكم ياجمع الأمم = تفرح ويالمهوي وتباشر بنور
سلام الله عليكم يااصحاب الكرم = يااهل الكرامه ويامعمرين السور

سليمان:
على النبي صلينا واكتب ياقلم =جينا نزف الواجب ف احضان السطور
الشامخيه ديرة عالين الرسم = اشهد شهاده مانلحجهم قصور

علي:
‏(لم يتم كتابة المقصب)

سليمان:
في مدعاهم جينا وشدينا الهمم = حديد وربعه يااللي عالين القدور
أذيه ديرتآ من أول مركاض الدهم = تدعى فواد الزاير طايب ومسرور

علي:
ماقصروا أهل الكرامه والنظم = وراعي الكرامه صيته شايع ومذكور
أول أحيد ف الديره اسيولآ تطم = على المفالي وادي وتسيل النهور

سليمان:
ألف الشكر ل ايزعلوا نواب الحكم = اليود بالمايود في وقت الذعور
م الحين أقولك باكر لا الغيث إنعدم = بعبر سباحه وبحوش بنادر صور



- - تعصيرة الخميس لم يتم كتابتها .

- - وبالخميس فالليل مقاصب الرزحة ايضا لم يتم كتابتها .( ويا خسارة لم تدون )

وانتهت الرزحة التي كانت مميزة ............................................................................................( ما قلت لكم الشامخية غير )

[سالم الوشاحي]

سلامي على هالمحاوره الجميله

التي أطربتنا بها سيدي الفاضل

في الحقيقه شعراء مميزون ماشاء الله

شكراً لك أستاذي محمد الراسبي

[خليفة الصائغ]

جميل جدا

استاذ محمد

نقل رائع

[سليمان الرواحي]

آآآآآآآآآآآآه
واخسارتااااااااااااه
فاتني

[كاملة البلوشي]

جميل يا استاذي هذي النقله الطيبه

ويسلموا الاخوان

[خالد الكويلي]

متميز كالعادة استاذي الغالي ما عليك زود

تقبل مروري

دمت بود

[سعيد العيسري]

ماشاء الله....اهل الطرب طربانين
تشكر يالراسبي على اهتمامك
وامتعتنا بالنقل

[أبو مسلم الصلتي]

شكرا لك على هذا النقل الممتاز ، تعرفنا من خلالها على طرب مصيره ، وأداء الشعراء المجيدين .
دمت بخير

[الرحبي]

الشامخية شامخة بطربها الأصيل

لك الشكر على أن نقلتنا إلى تلك الديار الطيبة