((( نار الهم )))

[سعيد المشرفي]

مساء / صباح .. الشوق.
قصيدة أقدمها لكم أحبائي عسى أن تشفع لغيابي.
شب نار الهم فيني دام حبك لي جحيم،،
وأحرق القلب المولع لين يتناثر رماد ..
شبها فضلوع صدري بين طيات الصميم ،،
لعنبو ذيك المحبة .. لعنبو ذاك الوداد ..
ما بقى للغيم دمع وما بقى للدمع غيم ،،
السهر عاف الليالي وانتهى عهد السهاد ..
والجروح اللي على خبرك لها نزفآ قديم ،،
تندمل لحظة وداعك والصبر عنك ضماد ..
زرع حبك في ضميري للأسف أصبح هشيم ،،
لو سقيته ما رويته منه ما أرجي حصاد ..
يا عذابي من عرفتك صار لعيوني لزيم ،،
وما عرفت الحزن إلا من عرفتك بالوكاد ..
ومال حظي من لقيتك وأصبح لقلبي خصيم ،،
وماتت بقلبي الأماني ولا لقيت الحظ جاد ..
وش جنيت بحبك اللي ما رحم طفلآ يتيم ،،
خان به وقته وجيته تلبسه ثوب الحداد ..
خاف ربك في عذابي دام ربك بك رحيم ،،
وارحم اللي بك تولع في هوى شفك وراد ..
غلطتي بس كنت واضح في غرامي بك غشيم ،،
ما عرفت ألعب وأجامل جيتك بقلبي سناد ..
غلطتي جيتك بقلبآ ما يبي غيرك غريم ،،
كن ما فالناس غيرك وما بعد قلبك بلاد ..
غلطتي!! وش غلطتي؟؟ مادام ماشي فالسليم ،،
إيه أحبك والهوى محشوم عن درب الفساد ..
لا تصدق ما سمعته كنت أمزح يا فهيم ،،
القصد معناه ثاني والحكي لو كان فاد ..
كنت بحكي من أشوفك بس والله العظيم ،،
أرتبك وأنسى حروفي وانطق الهمزة بضاد ..
صرت أحس الشمس تشرق في مسا الليل العتيم ،،
والنهار إن غاب طيفك يكتسي وجهه سواد ..
صرت أحس الشوق يظمأ مثل ما يظمأ الفطيم ،،
مثلما شوق الصحاري تحضن أنفاس البراد ..
ما ذبحني غير صمتي وأنت باحوالي عليم ،،
وما كتبت الشعر إلا صار له دمي مداد ..
مغترب يا شوق عنك صار طيفك لي نديم ،،
من دموع العين أشرب واحمل الأشواق زاد ..
يشهد الله والخلايق إني بحبك أهيم ،،
ما نويت الصد عنك ولا نوى قلبي البعاد ..
دايمآ تطري فبالي عد ما هب النسيم ،،
ما تغيبي عن خيالي حتى في حل الرقاد ..
تلمحك عيني وأضمك في حضن قلبآ سقيم ،،
وأنتظر موعد وصولك صابرآ والشوق زاد ..
ومن كثر ما صار طيفك في حشا صدري مقيم ،،
صرت خايف أعصي الله فالحشر يوم المعاد ..
يوم كل الناس توقف بين سين وبين جيم ،،
في وسط موقف يشيب كل طفلآ فالمهاد ..
صرت خايف لو أشوفك أطلب الرب الكريم ،،
سيئاتك أشتريها لو على ظلم العباد ..
لو تناديني بجيلك حتى لو عظمي رميم ،،
واحلف بربآ رفع سبعآ بلا أية عماد ..
بختصرلك كل هذا كثرة التعبير ضيم ،،
كل قصدي بس أشوفك ما بعد هذا مراد ..
بس يكفي من عنادك يابعد غادة وريم ،،
ويابعد ليلى ولبنى ويا بعد سلمى وسعاد ..
ويا بعد كل العذارى فوق جنات النعيم ،،
بس يكفي من عنادك لى متى هذا العناد ؟؟


وإعتذاري لكم على الإطالة في القصيدة.

[سالم الوشاحي]

أخي العزيز سعيد المشرفي

السلام عليكم ورحمة الله وبركاته

صح السانك ولاهنت

يبقى لحرفك وحضورك نكه خاصة

رغم الألم أجد لحرفك متعه جميله

أجدت في سبك الشعور أيها الأصيل

سجل إعجابي وتقديري العميق

[عبدالله الراسبي]

اخي العزيز سعيد المشرفي ابيات جميله وراقيه جدا
تسلم على هذه القصيده الرائعه
وتقبل تحياتي

[خليل عفيفي]

ما لهذه الشاعرية التي تجذبني روعتها
ومعانيها وما فيها من صور وروائع !؟
وتبقى أخي سعيد لا تقبل غير التميز
إبداع بأمانة
لا حرمنا هذا التميز

[تركي الحبسي]

سعيد المشرفي.. قمه من الأبداااااع

أسهاب في القصيده أضاف لجمالياتها..

شاعر جميل ومبدع

[راشد الشعبـني]

جمييل شاعرنا سعيد
صح الله لسانك وعلا شانك

أدعو الله يحفظك و يرعاك

[خليفة الصائغ]

نص مكتض بالصور واللغه الشعريه

رغم اني لا احبذ النصوص الطويله الا انهاااا رائعه

صح لساااانك يااابو عبدالله

دائما متمز وليس جديد عليك هذا التميز

لانك من بئيه شعريه خصبه

لك احترامي

[أبوراشد العيسائي]

جميل ايها العزيز
أبيات جزله
تسلم وصح لسانك

[ضياء الليل]

مغترب يا شوق عنك صار طيفك لي نديم ،،
من دموع العين أشرب واحمل الأشواق زاد ..
قصيييييييييييدة قمه فوق قمه فوق قمه
من اروع واجمل ماقرأت رغم الاسى والهم الا انها مشوقه جدا
سلمت اناملك

[أبو هلال السوطي]

أخي العزيز سعيد المشرفي
أبيات رائعة جدا وتدفق في الإبداع
صح لسانك ، تقبل مروري