آدم عرفته وهاتوا باقي التكملة

[عامرالناعبي]

محاوره في الرزحه
في قروب قلوب متسامحه
بين عدد من الشعراء :

عبدالعزيز البهلولي:
في ليلتن اسرى به جبريل الأمين
صلى بهم نبينا اخوانه وهله
في ذكرهم عددهم خمسه وعشرين
آدم عرفته وهاتوا باقي التكمله

موسى الكويلي:
يوم با نعددهم يبا حول وسنين
ما من قصيره ولا صعيبه المسالّه
تعجبني الصوغه من السبك الثمين
ياللي تصوغوها بروف وب مهلّه

بو ميحدالراسبي:
هذه الحكايه في زمان الاولين
صلى بيوسف والصفوف الكاملة
مؤسى وعيسى وهود والسد المكين
كل واحدآ زاهي بصلاته واعمله

عامر الناعبي:
ثلاثميه وخمستعشر
م المرسلين
حسبة فتاوى العلم حسبه كامله
كم واحدن لي في المهد متكلمين
عطني عددهم صاحبك لا تجهله

علي الساعدي:
يالله ياعالم بسر الفرقدين
ياواحدن مبله شريك يماثله
يبقى ذكرهم عند ربي العالمين
اصحاب عزمن ف الكتب لي منزله

جمعه الساعدي:
في ذكرهم ياصاح متسع سطرين
ربي ذكرهم جمله ومنهم فصله
صلى بزوزهم نبينا سيد الثقلين
في ليلتن سراها صلاتن كامله

عامر الناعبي:
راعي الطرب جاوب سؤال السائلين
ما حد منهم جاوبه ع المسأله
لي ماتعلم في كتاب الدارسين
يحسب من اصحاب العقول الجاهله

موسى الكويلي:
في عصر يوسف معجزه للفاهمين
يوم الشهاده جات من طفل اسأله
ونوبه ترى عيسى تكلم عارفين
في حظن امه يوم قومه تساله

عامر الناعبي:
ناقص عددهم في حساب الحاسبين
الحسبة نباها حسبتن متكامله
سير وتوكل صوب ناسن فاهمين
معهم فهامه في الشرع ودلايله

ناصر الراشدي:
كثير عددهم ياصحيبي واجدين
اكثر جوابك مع الفاهم باتحصله
كمن وكمن ماهم واحد واثنين
راعي الفهامه واجبك باتساله

عامرالناعبي:
وين المفسر صاحب العقل الرزين
ضاري يسهلها الأمور المعضله
نختم مثلنا وكونوا علينا مسامحين
عسى انتلاقى في الليالي المقبله