الذاهبة للشاعر ناصر القحطانى

[سالم الريسي]

ناصر القحطاني
(الذاهبه)


الله اللي راد و العقده قضاها اللي عقدها
لا على الدنيا السلام و لا لباقي العمر زينه


الفضا ما كنّه إلا خيمةٍ طاحت عمدها
و الفرح ما كنّه إلا شيخٍ انقصت يدينه


و العمر قطعة زجاج انكسرت و لا طال أمدها
و العرب في العيد بدموع اليتامى مستهينه


و الشوارع لفّها ثوب الظلام اللي هجدها
و البيوت أطلال من عقب المحبه والسكينه


و الشتا و الليل و البرد و سما يصرخ رعدها
والعيون اللي ورا الشبّاك مذعوره حزينه


طوّلوا في الكهف الأصحاب و بقت روحي وحدها
كنّها في كوكبٍ ثاني خلا من ساكنينه


الوداع اللي بعلم .. لعيني أعبر من رمدها
و الوداع اللي بلا علم .. لقفص صدري غبينه


و الوداع اللي بلا رجعه .. عليّ أمّر و أدهى
و الله إنّه غرغرة سمّ و سكاكينٍ سنينه


و العنود اللي جفيت الناس و الدنيا بعدها
مدّت الفرقا لغاليها و هي تعطي الثمينه


وينها .. كيف تركتني .. ليه ماجت في وعدها
و القمر لا طل خابرها تجي بيني وبينه


رحت أنادي و أتلمّس في مهب الريح يدها
كنّي حصانٍ بلا صاحب طوى البيدا حنينه


رحت أصيح الصبح وينه و العرب ما رد أحدها
ما سمعت إلا صدى صوتي يقول الصبح وينه


كنّهم من يوم ذيك الشمس غابت عن بلدها
طلعوني في النفود و صكوا أبواب المدينه


كنّهم من يوم ذيك الذاهبه محدٍ وجدها
كل رجالٍ من الشرهه قلع في الدرب عينه


أثرها ماتت و ماتت كل فرحه في مهدها
و الربيع أقفت به اللي كانت التاج لجبينه


جاورت عقب الحدايق حفرةٍ ما أقسى لحدها
حفرةٍ ماني مصدق كيف ضمّت ياسمينه


للحزن فيني مثل ما للطهاره في جسدها
ويش أسوي لا فتشت اللي لها وسط الخزينه


زخرفت حلم و بنت له مسكن و سمّت ولدها
آآه لو غرّد ولدها في خميلة والدينه


عاهدتني و ظفرت بيمينٍ أقوى من عهدها
و الصبي لا خير فيه إن كان ما نفّذ يمينه


ما تتقى عن رثاها عرقٍ اكتظّ بشهدها
و لا تبقّى خلف قضبان الجفن عذرا سجينه


كيف عند العالم أيام العزاء محصى عددها
و إلا أنا طالت شهوره و الله أعلم كم سنينه


لا الثرى فيها نبات و لا المشي خفف نكدها
لا السما فيها طيور و لا البحر يمّه سفينه


لا القمر هذا مساه و لا العصي هذا رغدها
لا الزهر هذا شذاه و لا الذهب هذا رنينه


قالوا الشيخ الفلاني مرجع القوم و سندها
قال يبشر بالعوض و العلم جينا ناقلينه


ساق لك بدر البدور اللي نشدها من نشدها
جادلٍ هزّت عروش و خيبت روسٍ ذهينه


قسمها في رسمها في جسمها إلا في رشدها
و إسمها إن جا للغضب قومه على الألسن رطينه


إترك الناي و عطيّة شيخنا غنّ لسعدها
و انبسط يا عم و إنسى اللي ورى التربه دفينه


قلت و لصدري تناهيدٍ تروّع من شهدها
آآه وا ويلاه من يجلب على قلبي ضنينه


خلّوا أغلى ذاهبه ترعى ربيع اللي فقدها
و العطا راعيه محدنٍ صوبه الله لا يهينه


لو ضمنت الجنّه و تفاحة القلب و شهدها
قلت من بكره عسا مجنونها تاقف سنينه

[عبدالله الراسبي]

اخي العزيز سالم الريسي يسلم قلمك الرائع والجميل على هذا النقل الرائع ويسلم الشاعر ناصر القحطاني على هذا الابداع ما عليك زود اخي تقبل تحياتي

[صالح السنيدي]

تسلم على هذا الإختيار الرائع

ناصر القحطاني رائع

[خليل عفيفي]

ماذا أقول أمام هذا النص الحافل بالصور الرائعة؟!!!
وعلى الرغم مما اعتراه من حزن ، إلا أن النص مما يروق لي الاستماع إليه بالفعل
أخي سالم ، بوركت على هذا النقل الرائع

[سالم الوشاحي]

أخي العزيز سالم الريسي

السلام عليكم ورحمة الله وبركاته

صور رائعه وشعور حالم جميل أخذنا لفضاءه

أبدعت وأمتعت يابوعبدالله بهذا النقل الرائع

ناصر القحطاني شاعر متفرد وكفى