إعلان : مسابقة في شعر فن الرزحة

[أبو مسلم الصلتي]

اخواني / اخواتي أعضاء المنتدى
بعد نجاح المسابقة الأولى في شعر فن الميدان نعلن اليوم .....
- موضوع المسابقة الثانية في ( شعر فن الرزحة ):
يشارك المتسابق بقصيدة واحدة هنا في هذه الصفحة بشرط ان تكون القصيدة جديدة من انتاجه ولاتقل عن ( 12 ) بيتا ، في أي موضوع مناسب يختاره الشاعر ، وعلى أي قافية يراها مناسبة لموضوعه ، وعلى ان تكون القصيدة على نمط الرزحة التي في المثال النالي :

من خاطري صغت المثايل والنظم :: نظروا على نقشة تفاصيله وحليه
يالابتي شــــدّوا العــــزايم والهمم :: قـدّامكم أمــــــر ٍ تراه يلـّه وعليه -

-المشاركة مفتوحة لجميع الأعضاء المسجلين في المنتدى ماعدا مشرفي قسم الموروث الشعبي فقط .
اخواني / اخواتي أعضاء المنتدى ساهموا في التقييم بإرسال رساله على الخاص لـ ( عبدالله الراسبي )
ويمنع التعليق على المشاركة هنا...
- يرجى الاطلاع على موضوع ( مقترح مسابقة للقسم ) للتعرف على المسابقة بشكل أفضل ...

بسم الله وعلى بركة الله نبدأ ،،،،،،،،،،،،

[بو ميحد]

يقـــــول بـــو ميحــد:
يــا لابتـــي تـــحــــية رب الـــعالـــمــــيـــن .... من اجـلـــكم نرســــلهـــا فــــي هـــــذا الســـيـــــــاق
شـــدوا العـــزايم و الهــمـــم بالمســـلمـين .... جــــدامـــكـــم موضـــوع يـــبـــغــــالـــه وفـــــــاق
لا تمــكــثـوا طــول الزمـــن مــتـــنافــريــن .... يـتـــخــرفـــوا عليـــكــم اصـــحـــاب الـــنـــفـــــــــاق
شلوا العطاء باليســرى و اعـــطوا باليـمـين.... شـلوا ســواد العتـــمه عـــن مـــســـرى الـــبراق
شلوا البراثن عــن مـــنبـــر صـــلاح الديـــن.... يـــا ســادتـــي هالــواقـــع شـــيــئن مـــا يــطـــــاق
الـــذاكـــره تــتــردد مـــوقــعــة حــطــــيــن .... و رب الـــســمــــاء عليـــكم مـــاخـــذ الــــميــثـــــاق
لي ينبشون الـــتــربه عـن قــــبر الــحســـين.... مـــا يرفــــعـــو المـــظـــــالم عن ارض العــــــراق
كـــــونــوا لنـــهــــج الســــابقين مــكــملـــين.... لا تقــــصــــرون الهــمـــه عـــن ركـــب اللــحـــاق
اهـــل الـــعــزايم لـــو كانــوا هـنــا باقـــيــن.... مـــا شـــان الاقـــصى و الـــفــضـــاء بعد مـا ضــاق
ســادو الــدنـــا مـتوحـــدين امـــجـــاهـــديـن .... يــستمـــتـــعوا بالهـــيـــجــاء عـــن ليــل العـــنــــاق
ما بيــن اهـــل الحق و بـيــن الــظـــالمـــين .... الــحـــق ظــاهر ظـــــاهــــر لـــو طــال الــســـبــاق
لن راد رب الــعـــزه خــيـــر النــاصـــريـن .... حـــن فـــي انـــتـــظــــاره قـــادم يـــوم الاتـــفــــــــاق

[خليفة الصائغ]

فكرة المسابقه جدا جميله

ولكن الاستاذ ابو مسلم لو وضعت معايير التقييم

لكن افضل وتحديد نسبة التصويت لجنة وتصويت الجمهور

سنحاول ان نكون من المشاركين باذن لله

[عبدالعزيز محمد]

بسم الله الرحمن الرحيم

يسرني ويسعدني ان أقدم هذه المشاركة في فن الرزحة (في الغزل) عسى أن تنال أعجاب ورضى القارئ العزيز:
يقول بن ضاحي:

سميت به يللي خلق سبع الطباق ******* وأدعى رسمها بلا سقيفه ولا عمد

يللي تقدس أسمه ذو الجلال و فاق ****** يا من بأيده الجنه ومفتاح السعد

وقرب يا كاتب هاتلي هبشة وراق ****** بكتب مثالي وأنته عارف للقصد

بأستعجلك هيا تولم للسباق ****** قدامنا عقبه وهزاهيز ورعد

شله كتابي وأعتني على أرفاق ****** وصل شكاتي وبالمعاني مستند

للمنتدى سمع وباقية الرفاق ****** ذا منطقن قاطع مسافات البعد

بلغ سلامي للي قدرهم ينساق ****** أهل اللطافه والسجيه والوهد

لي شوفهم باهي على نور الشراق***** بلغ تراحيبن كثيراتن يدد

قل للثريا عيني طافت الأفاق ***** من بين نجمات الدنا خلقت وحد

نوره شعاني وأيزى مبرق وبراق ****** جوهر سبا مكنون في بطن الصفد

العين دانه تسابق رميها تفاق ****** صابت ضلوعي ولا طاع الالم يهتد

وأما المباسم زادتني غلق وأوثاق ****** أيزت تنادي في دجى ليلن سود

مب له مثل في بر صنعا والعراق ***** ولا ريت له مثايل في كل البلد

في وصلهم تهيض هالسعيد أشتاق ****** والله اكبر عن دوسة رهاف الخد

وفي ودهن تيازى خاطري تواق ****** وما طاعني سقم الموده يفتند

ما فادت الطبه ولا قاري وراق ****** لي زرتهم زادوا ع ميتين بعدد

قولوا لنديمي كان الأدمي أوفاق ****** وفقي تعايا حثه واجتهاد وجد

ووصله شفايه من بعد زوود العواق ****** ت الحال بالي ولا بقى لسدايه رد

وهذا جوابي ومب لي من عاده مطاق ****** من كنت يا الطارش عنا أتحمل سد

والخاتمه أختمت قيلي والصداق ******* وصلوا على شفيعنا يوم الوعد

[خليفة الصائغ]

نص متواضع للمشاركة مع اخواني الافاضل

( بن سعيد )

سميت باسمك مالك العـــرش الوحيد
تغفر لنا يوم المنـــــــــــــــايا ممطره

وانثر ســلام (ن) صافحـك يد(ن) بيد
وانقش حروف(ن)من فؤادي معبره

لين امطرت بالشعــر غيمات القصيد
وتوشحـــــــــــــــت ابياتها بالمفخره

في ذكر افضـــــــالك علينا بن سعيد
جزل القـــــــــــــوافي جاتنا متعطره

حنا زنــــــــودك تصهر يدينا الحديد
من نسل مذحج والقبــــــــائل تخبره

نوطي على ظهـر الصعيب المستبيد
وافعالنا فوق النجـــــــــــوم مسطره

وسيــــــــوفنا متوهجة فوقت الوعيد
وسهــــــــــــامنا ورماحنا متحضره

حنا بنادق لا دوت صـــــــابت بعيد
تدوي على راس الكـــــبر وتصغره

يا سيدي قابـــــــــوس يالشهم الفريد
يا غيمة (ن) بالجـــــود تاتي محدره

شفت الكرات اللي دخلت جوف الوريد
ومن صميم القلب حمـــــــرا مدوره

حبك يخالط جـــــــوفها مثل العصيد
اللي تخالطه السمـــــــــــن ومحمره

وجاك الولاء ممزوج بحروف القصيد
متلبس (ن) عز وكـــــرامه ومفخره

خليفه الفارسي ( الصائغ )

[سليمان الرواحي]

السلام عليكم

من كلمات سليمان بن عبدالله الرواحي
***********************

ألا يالموده خليتي الفؤاد عطيل
وينوح نوح الراعبي ف دوحته
قلبه صحيح و قلبي ما يبات الليل
هيمان يشكي الحرقفان و ليعته
أول سقاني من شراب السلسبيل
واليوم يسقيني الحبن بمرارته
لي صاحبن ما له صقيب ولا بديل
غرن غريرن عدملين صورته
الوجه بدر بازغ والخشم الجميل
بدر كمل سنه ف صافي ليلته
والفرع ضافي والغداير له تشيل
متحالكا مثل الضلام سوادته
العين سودا و الهدب سوى ضليل
حراس عينه من الرمد و قذاذته
والخد يسني كنه براق ف مخيل
حمر الوجن ورد و وسن بغلالته
طعم الشفايا شهد من جبل الرسيل
يشفي السقايم ويبريهن علالته
ومعنق يشبه على ظبي السليل
رابي على فناقه وطيب فراحته
أما الصدر براحه مسحوب وصقيل
كنه سجنجل غالين في قيمته
والتين يزهى و شفى حال العليل
بالعنبر الغالي يتضوع ريحته
والخصر حسبة شبر مهضوم ونحيل
مثل السجل مطواي ومحلى طيته
والردف نابي في شوف النظير ثقيل
يتمايلبه ان خطى في مشيته
ليمن مشى مشي القطا وقت المقيل
يخطر على قلب الشقي بخطوته
نفحة ردونه مسك من مسافة ميل
يحيى به الميت و ترجع سيرته
قصرت وصفي وخايف من قال وقيل
صلاة محمد عن عيون المبهته
ويا لابتي ف شفه تراه طايح قتيل
ثيبوا دريك طاح وحانت ساعته
والخاتمه قرينا حالهم تسجيل
عسى يسمعوا له فؤادي وصيحته
هذا مثالي وشد يا صاح الرحيل
شله و حفظه عن يعلموا لابته

[خليل عفيفي]

أخي أبو مسلم الصلتي
بارك الله لك
نتمنى لك التوفيق
فكرة لها آثارها وثمارها الأدبية في الساحة الشعرية
متابعون بكل فخر

[أبو مسلم الصلتي]

انتهت فترة تقديم القصائد ، وأغلق الموضوع للتقييم ، تمهيدا لإعلان النتائج ....
أخي / أختي
إذا لم تصوت ، يمكنك الآن التصويت بإرسال رسالة باسم مرشحك إلى الفاضل عبدالله الراسبي خلال هذين اليومين .
والله الموفق ،،،،،