هاي مش أي حدا

[حمود المهزاع النعيمي]

هاي مش أي حدا ؟!!!

هَدْ هدّي هَدْ هدْ هدّي هدْ هدْ بالهدا
إستهدي وتهيّد وهاود واهتدي

ماهُوبْ كدا ماهُوبْ كدا ماهُوبْ كدا
ما هكذا تورد لبل يالَجْوِدي

لو هُدهُدِ سْليمان شافك ما هدا
حرّم على ذرّيته تاج الهدهدي!!

طفول وِتْفاطا وطَفْطَفْ واهتدا
طَفْ طفْ لطيف الطفطفه وْطفّ وْهِدي

يعني انْها بلبناني هَايْ مش أي حدا
بطرانه تتعيّل بها لو مهتدي

ولا سوّي فيها شيّ وِيْقالِ اعْتدا
من ستة اشهر معتكف في مسجدي!!!

عمري هدى روحي هدى كلّي فدا
هدى هدى وينك هدى يَا انْتِي ابْعَدي

اتعمّد اغْلط بسمها وازقر هدى
ودي اجرْها للكلام ونبتدي

وان شبّت الغيره وقالت من هدى
قلت آآ.. هدى الاسلام دينِ مْحمّدي

صافحتها وروّحت بلحق ع الغدا
وانّي بلا صابع ولا كفّ اعْضِدي!

ثرها صبوعي اللي اقبضت حيلِ بْيدا
وهي من لُطُفْها وافقت تاخذ يدي!!!

في خصرهَا يْضيع الخبر والمبتدا
وفي عينها يستغفر الله حُسّدي

أصبّر قْليبي هِدا إهدا هِدا
واصبّر عْيوني هِدي إهدي هِدي

قلبي يهدّدني يفجّر لوردا !!
أمّا عيونِي بْلنتحار تْهدّدي !!

حتى البحر لا شافها متمدّدا
ع الشاطي.. ألغى الجزر وامتدّ الرّدي

يبغي يدشّ بْفمها والمقصدا
تتفل ومن سكّر شفاها ينعدي !!!

كرْ كرّ وتكركرْ وكرّر واكّدا
وانا كأنّي صلب وسط الموقدي

واقف وحيد آواجه اربع اجودا
عيني وخفاقي ونفسي وِكْبِدي

لوّل يلبّيني هلا ياسيّدا
واليوم انا البّي هلا ياسيّدي!!

ينزل صبي عينه بقلبي وْ يصعدا
وانا صبي عيني حليله مْقيدي

حتى السهام اللي عليهِ مْسدّدا
بالعكس ردّت لين صابت أوردي !!

وانا قسم كل سهم صوبي يوردا
أحضَنْه كن م المدرسه جاي اُولدي !!!

بسّ ارْكدا بسّ ارْكدا بسّ ارْكدا
يللّه ارْكدي يلله اركدي يلله اركدي

تدرو بأنْ برج الجدي لي في المدى
لجل انّهِ يْشوفه سقط فوقِ بْلِدي

طاحِ بْدبيّ وْ غيّرو إسمَه وْ غدا
في الحال برج دبيْ بدل برج الجدي!!!

ماكلّ غيمه ماطره فيهَا ارْعدا
لكنّها تمطر إذا فيهَا ارْعدي

ولو كلّ من اسمه سعيدٍ يسعدا
غيّرت انا وسمّيت نفسي أسعدي!

قولو له لا يكتب بشات المنتدى
ودي اشوفك ياحبيبي في الغدي

يكفي انه في عقله يحدد موعدا
ولا يخبّرني ولاَ يْخبّرْ حَدي

وانا قسم بلله لا لبّي النّدا
ويلقاني أتريّاه حسب الموعدي !!!


حمود المهزاع

طفول: ناعم رقيق
تفاطا : دخل ظهره وبرز صدره
طفطف: استسلم
طف طف:علا وارتفع
الطفطفه: الخاصره .. الخصر
طف: وثب
كر : زحف واندفع مهاجما
تكركر: ضحك من خاطره وبصوت مسموع
كرر: فعل ذلك اكثر من مره