(تغرود) اليوم غردت في جيتي بو طابوقه ،،،،كيفي أحبه... قولو ما يجوز لك ... زين من حقي

[محمد الراسبي]

اليوم غردت في جيتي بو طابوقه وطبعا لا تقولو لي ليش لاني احب الجيتي من صغري لين باكر قلت فيها

تغرود - بو طابوقه

يا راكب ن في جيتي بو طابوقة
يبهرك سوقه أن بغيت تسوقه
أختاره اللي بس طايب ذوقه
بينه وبيني علاقة ن موثوقه

نغمة جزوزه نغمةن مرموقه
هو عالم النيسان من معشوقه
يعزيك حاله قومته ومطلوقه
دلّعه يا صاحب عطيه حقوقه

فيه التواير نقش مب محروقه
ولاّ خرابه ما يقرّب فوقه
أمبونه النيسان عالي سوقه
بانت مقاديره وبان فروقه

لو جيت صوب الزد ماشي يفوقه
ولاّ السفاري ف الرمل وعروقه
فيه المكينه ضبط مب ملفوقه

وميحد يغني مطربني شوقه

غردت أنا بتغرودة ن مخنوقه
يا راكبن في جيتي بو طابوقه

وعاد غرّد وشل الصوت يا المغرد ولين حد سمعك خبرني ... من حس جزوزه

[محمد الراسبي]

وغرد يالمغرد

[أبومشعل]

الله حلو التغرود تسلم اخي

[أبو مسلم الصلتي]

ماشاء الله تغرود جميل في الجيتي

لكن أخي محمد ماكنك خرجت عن الجيتي في هذه الأبيات !!

لو جيت صوب الزد ماشي يفوقه
ولاّ السفاري ف الرمل وعروقه


دمت بخير

[خليفة الصائغ]

جميل هذا التغرود

ابداع يااا استاذ محمد ..

ويستاهل جيتي ابو طابوقه

[فهد مبارك]

يريد لها شلة صوت سجلها ونزلها وبنسمعها

مع التحية

[ليلى العامرية]

السلام عليكم ورحمة الله وبركاته....


بصراحة حلو الجيتي...

والله يهنيك فيها .... بس لو كانت همر أحسن.. هههه

أبداع جديد ومميز...

وتقبل فائق أحترامي وتقديري أخي الكريم محمد الراسبي.....

[عبدالكريم السعدي]

الراسبي صح السانك..

بس ياخوي بسألك هالنوعية من الجياتي للحين
تعيش..

ياخوك انا خبري الكويتيين ما خلولنا لا جياتي ولا زدات
كلها شروها ما باقي غير تسعه وثمانيين يسمعك صوته
ههههه..

[سعيد العيسري]

وميحد يغني مطربني شوقه

روووووووووح الراسبي
اسميه انه موتر وميحد يدندن,,,, كيف للبيع؟؟؟؟تراني شراي؟؟؟