قصيدة( رفيق الدرب ) .. وقصيدة ( تبر الحروف )

[صالح السنيدي]

هذة قصيدة رفيق الدرب التي أتشرف بان أهديها للشاعران أخي ناصر سالم الهاشمي ..
و الشاعر حميد بن سعيد الحجري .

و .. وأتمنى أن تنال على رضاكم ..
تحياتي : صالح السنيدي


( رفيق الدرب )

يـقـول وادي الشـعـر والـظل وارف
أن الصـديق أسـلاح لـصـار وافي

ولن هو تأخـر عـن زيـارتـك زوره
مــــد الـوداد وشـل يـد الـخــلافـي

لا خـانـك الـتاريخ في تـالي الصـفـا
تـلـقـاه ســيـفــك فـاللـوازم سـنـافي

فـيـه اللـواء معـقـود والخيل ساحـته
تـسـنـد عـلـيه ودرع حـد الـرهـافي

هـو مالك الـمخـزون والعـهـد ظلته
رفـــيـق درب ولابــتـك ســـد كـافي

كـنه أبو حماد ناصر تميم الـصـخا
خـذ مـ السحـاب ومد خضر الـفيافي

المعضد المأتور عضـبٍ صـيـرمي
رداد قـــوم وكــاهـمــن كــل هــافي

شـوفـه ملى حالك وكـفـك يمــتـلي
غـيـثٍ طغى خـيـرة ولـو سار حافي

يا مهـنـدي أهـشـم هـدهـاذ الـوفــا
ناصر ربـيـب الـعـز والـعـود صافي

ولفـيت عهد حميد بوسعـيد زوتي
راس الـطـويـلـه فـالـرخـا والـكـلافي

ذخري ولد عيسى نواميس العلى
أهـل الـشكـيـم أفـذاذ شـمـخ الـعـفـافي

رويت عـن ربعي وكـلهـم ديرتي
يا دهـيـم رد الـشـوف والـوقـت نـافي

وجـدي عـلـيك دهـيم سرّاح انطفـا
الـدرّبْ ديـــْرّ وصْـمَـعَـتـّــنــا مــنـــافي

صالح السنيدي

ـــــــــــــــــــــــــــــــــــــــــــــــــــــــــــــــــــــــــــــ



القصيدة مهداه الى اخي صالح السنيدي ردا على قصيدة اتى فيها بيت يقول فيه

كنه ابو حماد ناصر تميم السخــا
خذ م السحاب ومد خضر الفيافي

فاحببت الرد من جانب رد الجميل عسى ان تنال رضا كل من يمر بما فيهم صالح


عنيت مـن تبــــر الحـــــروف النظافي
يــــا معــدنٍ صافـي ولــــــك قدر نافـي

طـــــــــرزت طــــرقٍ عقربيٍ مخــايلــه
هتــــان ودقــــه مـــرهمٍ ب الـرضـافـي

في شف من تعشب من الجود ساحته
صالــح عريب الأصـل صافي وضافي

لـن خــــاض وادي الشعـر يعل منبعه
إليين تعشب مــن حـروفـــــه الفيافـي

وأن طـاش بحر الشعر عـــود بدانتـه
ثُمْ صـاغها عقـدٍ تشابــــــك قــــوافـي

ولـن زار بستانٍ قطف منــه زهـــــرة
يـا حظها لـــــو شكلت ب الخـــزافـــي

وان ســــار درب الحـق العـدل شيمته
مـا خاف لـــوم اللـــوم مفطـور وافـي

كنه صغيـر القــــوم لا جيــت زايــــره
متعب سجـــايا الحــاتـمي والمظــافـي

واذا نطق يقرض مـن القول اصدقــه
محشوم عــن هـــرج الهزيل السفافي

ماخـذ مــــن طبـوع الحـرار ارتفاعها
وله ب التــواضع م الأراضي لحافـي

سـلام مـن عنــا قصيـــــــده وخصْنـي
بأبيـات جزلـه مـا حـوت لكتــلافــــــي

مني ولـك يـا صـــاح وافــــر تحيــــة
توصلـك والسمحـــــان جاتـك عجافي


تحياتي للجميع /// ناصر الهاشمي.

ــــــــــــــــــــــــــــــــــــــــــــــــــــــــــــــــــــــــــــــ

هذة القصيدة اهداء للشاعر صالح السنيدي لرد على رفيق الدرب اخوكم : حميد الحجري


يامرحبا بمزنن بروقـــــــــــه رفافــــي
لاهلً وبلـــــــــــه واعشبت به الفيافي

ترحيبةٍ مليــــــــــار وان زاد زايـــــــد
لأهل الجمايل نورد الجــــــــزل ضافي

خطٍ نظرتـــــــــــــــه م التبر والجواهر
يفـــــــوق قيمــــــــــه غير كل القوافي

لــــــــو هو تجزأ لـــــــه بهالقلب منزل
وأن هو كمـــل زادت حظوظه أضعافي

عهــــــدي بوادي الشعر خصبٍ ووارف
ماأثـّرت فيه السنيـــــن العجافــــــــــي

وعهــــدي بوادي الشعر تكسوه خضره
أريج عطـــــــــــــــره يسلب القلب كافي

وعهـــــــدي بوادي الشعرصافي وروده
عــــــدٍ غزيـــــــــــــــــرٍ ماتجزأ نصافي

وعهـــــدي بنهــــــر (النيل) يروي زلاله
وعهدي بجزيل الحرف عند (الرصافي)

بوسعيد يانســــــــــــــل القروم البواسل
صنديد حربٍ من سلالـــــــــــة اشرافي

يبقـــــــــــى الصديق سلاح في كل محفل
ان كــــــــان في طبعه صدوقٍ و(وافي)

لشتّدت الهيجا تلاقيـــــــــه رمحــــــــــك،
ترســـــك وسيفـــــــــك باسلٍ ما يخافي

يفدي بحــــــال ومــــــــال ماقـــــــد تخلّى
ويســــــــــوم عمره لين آخر مطافــــــي

يبقــــــــــــــى وفيّ ٍ لك ولاقـــــــــــد تغيّر
لو شاف في بعض الأمـــــــور اختلافي

بلســـــــــم جروح الدهـر، يبري ويشفي
وماكل دوا ويصيــــــــر للجرح شافي

هذاك لــــــــــي فرضـــــــن علينا نزوره
نمّد حبل الوصـــــــل دون التجافــــــــي

عنيــــــــــــت لك حــرفٍ منّقـــى مصّفى
ماهو بمـــــــن كــــير البيوت الخفافي

يوصلْك وانتـــــــــــــه في نعيـمٍ وراحه
ومن فضل ربك في الزمـــــان امْتعافي

وصلاة ربـــــــي ع النبـــــــي القريشي
بعداد من صلـــــــــــــى وبالبيت طافي

تحياتي / حميد بن سعيد الحجري