محاورة بين سالم بن سعيد المحيجري والشاعر خميس الرشيدي
بتاريخ 8/7/2015
سالم:
ابن الرشيدي اقبل من سالم سلام
من صور داري قاصدنكم زايرين
وبنثر تحيه نفحها من عود خام
ويا رب تكونوا للهدايا قابلين
خميس:
ياحي من ياني وخذني بالكلام
مترقبله ماكنت من الغافلين
وقبل تحياتي ويا نسل الكرام
وانتو عرب علام ناسن عارفين
سالم:
أنته سكنتك بركاء ولا في ودام
وعطني علومك وين كنتوا ساكنين
واجب سؤالي خووي باب الإحترام
وحترامنا باقى على طول السنين
خميس:
تنشد عن دياري تفضل ياغلام
نسكن طروف سويج نسل الاكرمين
لن جيت من شرقا غربيها وأمام
فيها ربع وخوان صفوت مخلصين
سالم:
طيبة ومروة يوم حثينا المشام
تاريخ يشهد والخلايق شاهدين
ونبغى نسالك عن دواوين الكلام
ويمكن تكونوا فالثقافة مسجلين
خميس:
ماشي عليكم زود وافي بالتمام
ذيك النسايم ريحت قلبي الحزين
وتهيج الخاطر وزاد به الغرام
وأستغفرالمولى ترانا صايمين
سالم:
وأنته كلامك مثل نفحات الخزام
بونه كلام الزين عطر الطيبين
أنته مشارك عندهم مكتب الإعلام
فحلقة أماسي ما تكونوا مسجلين
خميس:
ياطيب منطوقك على صدري وسام
ما ظني الإعلام عني عارفين
أنتو وساتيد الحكي صفكم جدام
وحن عقبكم نعتبر م الدارسين
سالم:
سلم عليهم كلهم يمله العلام
من هين ما ساكن يلين مشرقين
الغاربي وعنده المويتي بالنظام
وأهل الشطارة عنهم ما غافلين
خميس:
سالم تفضل عندنا زور المقام
نتشرفبكم لن وصلتوا مشرفين
فوداعة لي زال عن قلبي الظلام
صلوا على المختار نسل الاكرمين
تمت