[محمد الراسبي]

- - سليمان بن عبدالله الجهوري
- - الشعر الشعبي
- - أراضي النور

ضمت هذي السواقي ويدها ف الما
وتعبت أدفق عليها نبعة الغيزان

وأنتي في سماك الغيم لو يضما
رويته دمعتين وجفت القيعان

زرعتك في أراضي النور
وأنتي اللوحة الخجلا
وجيتك أحمل الذكرى بدون شعور
لعمدانك ي أرضي ضي عيني
والسماء طينك
أشوفك حبر بأوراقي
وأنا الأوراق وأنتي هالحكي المسكوب بأعماقي

سنين وكل مامرت بي الذكرى
ذكرتك مثلما كنتي على المستور

يا زمارة حنين الصبح للساقي
كثر ماخانه الماي بسواقي البور

كثر ماحن لبلاده بألم ماضي
من الماضي
عطشت ولا لقت ما بلل شفاهي
وأتعمد بعتم الليل
أسقي نخلك العطشان
ولا تشوف السماء مايك ويتبخر
وأزقر من لفى طينك
على الديجور
خالي والصدى يدينك

ي ماي.ن أزجره وأعطش لأجله شهور
وأرده في سواقي القيظ والذكرى

فسلت ترابك بساق.ن غدا مبتور
كثر ما أغرس كفوفه بيدي يضرى

على يميني رضمته وعبك المحفور
وخليت العمر يجري بيدي اليسرى

أنا من شاب وجهي ف التراب دهور
لمحتك في عيون الود والبشرى

على شوف.ن يفيض بدمعتي ويدور
وأنتي تحملين التربة العذرا

يرفرف لي علمك بهيبتك كالنور
بياضك والجسد والشيله الخضرا

بلادي ..! لو أموت بتربتي مهجور
يظل الدم يسقي منبع المجرى

سنينك ما روتها قلت المذكور
وأنتي يالسنين الأربعين أدرى